Mediu Ambiente atiende por fin les demandes de vecinos y ecoloxistes y apreba un plan pa reducir nun 79% la contaminación producía pol canceríxenu bencenu en Trubia

La conseyería d’Infraestructures, Ordenación del Territoriu y Mediu Ambiente vien de facer públicu un plan d’aición con 26 midíes p’amenorgar cuasi un 80% los niveles de bencenu en Trubia.

d’alcuerdu coles previsiones del plan, les actuaciones qu’impliquen tanto a l’Alministración central como a les empreses, fadrán que pa diciembre de 2018 les emisiones d’esti contaminante caigan dica un 90% respeuto a 2016. Les más importantes d’estes midíes son les empobinaes a amenorgar les emisiones difuses procedentes de les istalaciones industriales, principalmente, les aniciaes en Química del Nalón y en Industries Doy Manuel Morate. Ambes empreses realizarán por ello, actuaciones de meyora por un importe de 4.296.873 euros y 245.130, respeutivamente.

l’informe previu a l’adoición d’estes midíes revela que la principal fonte de bencenu orientase al’oeste, sonde s’alluguen les istalaciones de Química del Nalón, precisando que nin la influyencia del tráficu nin de les calefaciones de carbón ye bultable nes midíes tomaes

Nun foi fasta l’añu pasáu, cuando les continues denuncies de los ecoloxistes forzaron el cambio d’ubicación y la meyora de la estación de midición, que s’entamaron a recabar datos fiables. Anguañu ta situada nes piscines municipales, nel centru Trubia, y ta dotada con un equipu analizador de BTX (bencenu, tolueno y xileno). Gracies a esti midior pudo constatase que les concentraciones de bencenu másimes pa la proteición de la salú  -5 µg/m3- rebasense ampliamente de contino, con una media de 8,2 µg/m3 y abondos picos que superen asgaya los 40 µg/m3

Remembremos que la contaminación por bencenu ye altamente nociva y nesti casu afeuta dedne hai décades a una superficie d’alrodiu los 18 kilómetros cuadraos y una población de 2.316 habitantes.

Dende la C.E.A. espresaben la so satisfaición por esti llogru, pero tamién amosaben la so rocea “esperemos que nun seya más propaganda del Principado, que ya anuncio hai meses que to ta arreglao”.

Redaición InfoAsturies

This work is licensed under a Creative Commons Attribution 4.0 International License.