Concentración en defensa del castru de Podes

  • 12 Mayu, 2017

Un  añu más, el díe 14 la Lliga Celta d’Asturies y l’asociación cultural El Curbiru entamen una concentración nel castru Punta’l Castiellu pa llamar l’atención so la situación d’esti emportante resclavu del nuesu pasáu

El castru de Podes ye`l segundu mayor castru costeru ástur depués de la Campa Torres (Xixón). Catalogáu por J.M. González nos años 60 del sieglu XX ye descritu por numberosos especialistes, que resalten l’importancia de les sos dimensiones, les sos defenses, y de los materiales.

Dende hai más d’una década estramaos coleutivos denuncien la situación d’emerxencia d’esti xacimientu nel que la erosión progresiva por aiciu del mar fae peligrar elementos arqueolóxicos entá ensín estudiar, valorar y catalogar, lo que fai especialmente urxente una actuación por parte de les entidaes competentes que permita estudiar, protexer y nos casos que seya preciso, restaurar esti castru, que podría apurrir afayos interesantes pa pescanciar y caltener meyor la nuesa hestoria llonxana.

 La concentración y posterior visita guiada tendrá llugar el prósimu domingu 14 de mayu a les 11:30 nel aparcamientu del Cabu Peñes, conceyu de Gozón.

Fernán Morán. Presidente de la Lliga Celta d’Asturies, insiste en que la invitación nun ye namái pa persones físiques, sinón tamién pa partíos políticos, asociaciones, coleutivos, istituciones, etc,” ye dicir, pa cualesquier persona o entidá que ame’l Padremoñu asturianu ya entienda qu’hai que caltenelu pa les xeneraciones futures”.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *