La vergoña de les Feries d’Abril

  • 30 Abril, 2017

L’Ayuntamientu Piloña vien llevantando angüeñes añu ente añu cola so cellebración de la Feria d’Abril. Un ayuntamientu que se ñega a sofitar les comisiones de fiestes de los pueblos del conceyu porque diz nun tener perres, y que nun dedica un chapu a la cultura asturiana, entama una parodia flamenquista de la Feria d’Abril que nun respuende a dengún criteriu social, ello ye, en Piloña nun hai dengún colleutivu andaluz, nin rellación especial con dengún ayuntamientu nin organización andaluza dala.

¿A qué vien esi enfotu flamenquista? Dende l’asturianismu denúnciase lo evidente: Ye un intentu más d’aculturización, d’españolizar Asturies, dedicar los presupuestos municipales a una cultura ayena, mentes se sigue afogando la propia. Nun ye una casualidá que l’Ayuntamientu seya del PSOE, la mayor espresión d’odiu a tolo asturiano.

Dende Andecha Astur coinciden con esti analís y curiense d’amiestar que nun se trata de denguna fobia escontra los andaluces, porque en rialidá’l propiu pueblu andaluz vese perxudicáu por esi seudofolclor elleváu a la categoría de sencia ultraespañolista. Trátase de defender la identidá asturiana escontra los intentos d’asimilación d’Asturies. Nel PSOE tan obsesionaos con faer d’Asturies un barriu de Madrid, y aflamencar les fiestes asturianes mentes se-y ñega’l sofitu a les fiestes tradicionales. “En Piloña les fiestes tradicionales muerren por falta de sofitu, nun tienen iguada la toponimia, nin esisten Ordenances de Conceyu d’Oficialidá que respeten el drechu de los vecinos a emplegar la so llingua. La represión ye sistemática”.

Pero l’exemplu espárdese, especialmente nos ayuntamientos del PSOE, y por casu, en Lluanco –Gozón- cellébrase esta fin de selmana otra flamencada… por supuestu, en Gozón tampoco tienen iguada la toponimia nin esisten Ordenances de Conceyu d`Oficialidá, y tamién ye una alcaldía del PSOE.

This work is licensed under a Creative Commons Attribution 4.0 International License.

2 Comments Already

  1. Soy el alcalde infiestu, quien escribió esto? Voy dabos a tos

  2. En gran parte estoy de acuerdo en ese comentario, tenemos grandes coses pa no necesitar nada de otres cultures pa facer unes fiestes envidiables.
    Yo soy piloñes y nunca fui, el dia que me interese la cultura y bailes andaluces, voy directamente a andalucia,nunca me interesaron les copies chines.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *