Andecha Astur caltién el testigu de los soberanistes de 1808 y, como seña d’esi compromisu cola soberanía d’Asturies, convoca pal domingu 24 de mayu l’homenaxe a una de les feches más decisives de la hestoria contemporánea del país: la Declaración de Soberanía de la Xunta Suprema d’Asturies.
Cartelu de la convocatoria
El 25 de mayu de 1808 el pueblu asturianu protagonizó’l primer actu d’autodeterminación de la dómina contemporánea nel Estáu español. Nun foi una decisión tomada dende arriba nin una maniobra cortesana: foi’l resultáu de la presión popular, de campesinos, estudiantes, trabayadores y milicianos qu’obligaron a la Xunta Xeneral a romper cola obediencia a les órdenes veníes dende Madrid y cola sumisión al poder napoleónicu.
Más de dos sieglos depués de la declaración de soberanía de la Xunta Xeneral de 1808, aquella afirmación revolucionaria de que “el poder, tol poder, reside y procede del pueblu” sigue teniendo una fuerza política y simbólica impresionante. Poques frases resumen tan bien la llucha d’un pueblu por decidir el so futuru y defender la dignidá colectiva.
La nueche del 24 al 25 de mayu, con miles de paisanos armaos entrando n’Uviéu y cola toma de la Real Audiencia, la Xunta proclamó la so soberanía, declaró la guerra a Napoleón y asumió toles competencies d’un Estáu: exércitu propiu, representación internacional, símbolos nacionales y gobiernu soberanu. Nacía entós l’Exércitu Defensivu Asturianu Exércitu Defensivu Asturianu, con 30.000 homes de tolos conceyos, y consolidábase la bandera d’Asturies -diseñada baxo la inspiración de Xovellanos-, cola Cruz de la Victoria y el llema “Asturies nunca vencida”.
Aquella decisión nun yera solamente una respuesta militar énte la invasión francesa. Foi una revolución política. Pela primer vegada afirmábase claramente que la soberanía nun residía nun rei nin nuna potencia estranxera, sinón nel pueblu. Esa idea, avanzada pa la so dómina, convirtió Asturies nun referente políticu y abrió camín a les futures tresformaciones democrátiques y constitucionales.
Más de doscientos años depués, la reivindicación del 25 de mayu sigue viva porque les razones de fondu siguen ensin resolvese. Asturies continúa enfrentándose a desafíos que comprometen la posibilidá d’una vida digna pa munches persones: falta de vivienda asequible, despoblación, precariedá llaboral, emigración xuvenil, destrucción industrial, pérdida de soberanía económica y decisiones estratéxiques tomaes lloñe del país y d’espaldes a la so xente.
Dende Andecha Astur afirmen que, agora como nunca, el pueblu asturianu precisa soberanía “Nun se trata namás d’una revindicación simbólica o sentimental, sinón d’una necesidá democrática y social. Tener capacidá pa decidir sobre los recursos propios, la enerxía, la llingua, la industria, el territoriu o los servicios públicos ye imprescindible pa garantizar condiciones de vida dignes a les persones qu’habiten Asturies” declaren, aporfiando’n que la ensiñanza de 1808 sigue plenamente actual: cuando’l pueblu asturianu toma conciencia de sí mesmu y actúa colectivamente, ye quien a abrir caminos nuevos.
Aquellos homes y muyeres qu’entraron armaos n’Uviéu entendieron qu’en momentos decisivos nun val la resignación nin la dependencia. Entendieron que la dignidá d’un pueblu pasa por exercer la soberanía.
Y por eso aquella frase pronunciada hai más de dos sieglos sigue emocionando y marcando’l camín: “el poder, tol poder, reside y procede del pueblu”.
This work is licensed under a Creative Commons Attribution 4.0 International License.
