Dada la situación na que s’alcuentra la población salmonera nos ríos asturianos, resulta grotesco que siga celebrándose —y entá más, faciendo negociu— cola muerte d’un exemplar más.

Nun falamos yá d’una tradición inocente nin d’un símbolu folklóricu: falamos d’una especie cada vegada más menaciada, con temporades piores añu tres añu y con ríos que van perdiendo vida ensin que se pongan en marcha les midíes necesaries pa revertir la situación.

Poro, y ante la iniciativa privada que pretende puyar güei pol Campanu pente dellos establecimientos hosteleros, convócase un boicot contra’l restorán que decida mercalu, pidiéndose a la población asturiana que nun consuma nel mesmu. Esta mesma tarde conoceráse’l nome del llocal que pagará probablemente una suma bien curiosa por esti salmón, cola intención de convertir la so muerte nun espectáculu gastronómicu y mediáticu, sacando provechu enriba del alderique xeneráu.

La idega del boicot ye clara: que non solo nun haiga comensales pal que bien podría ser el caberu Campanu de la historia, sinón que la decisión y la falta d’ética de quienes deciden facer negociu suciu colos nuesos ríos yos pase factura a la llarga: que nun se consuma res nel establecimientu. 

Resulta llamativo ver cómo, mentanto biólogos, pescadores y asociaciones ambientales vienen alertando del desplome de la población salmonera, sigue habiendo quien ve nel Campanu una oportunidá comercial perfecta pa salir nos medios, xubir fotos a redes sociales y cobrar a preciu d’oru un menú “históricu”.

Y equí ta quiciabes la contradicción más grande de toes: cuanto peor ta’l salmón, más valor económicu paez adquirir la so muerte. Como si la posibilidá de que queden cuatro acabara convirtiéndose nuna campaña de márketing. Una llóxica perversa que, vista dende fuera, paez más propia d’una sátira qu’una tradición que quiera presumir d’amor polos ríos y pola natura asturiana.