Cuando l’alministración se confunde y quien paga ye la xente más vulnerable, nun falamos d’un error técnicu. Falamos d’ inxusticia social.

La situación de les deldes reclamaes a perceptores del Salaríu Social Básicu y del Ingresu Mínimu Vital ye ún de los mayores fracasos sociales y alministrativos vivíos n’Asturies nos últimos años.

Nun se trata solo d’un problema burocráticu: falamos de families vulnerables, de persones con ingresos mínimos, de llares que malpenes lleguen a fin de mes y que, de la nueche a la mañana, reciben cartes desixendo miles d’euros que nun tienen nin tuvieron nunca.

Dende Andecha Astur reclamóse ya nel 2021 la condonación d’estes deldes, como mínimo nos casos nos que la persona beneficiaria comunicare a tiempu los cambios y siguiere nuna situación vulnerable. Esa propuesta foi refugada recientemente pol Gobiernu asturianu, que vien d’anunciar que descarta condonar eses deldes, anque promete “modificar la tramitación pa que nun penalice a les persones más vulnerables” -ello ye, asegurase de que paguen les multes pero facilitar los medios de pagu, p’asegurase de cobrar-.

La propia Conseyería de Drechos Sociales reconoz que los plazos alministrativos son llarguísimos y qu’eso provoca perxuicios graves. Esa admisión confirma lo que les families denunciaen dende hai tiempu: l’alministración tarda años en revisar espedientes, sigue pagando cuantíes ensin resolver incompatibilidaes nin incorreiciones y depués carga la responsabilidáde los sos fallos alministrativos sobre los perceptores. 

El resultáu ye demoledor. Hai casos con reclamaciones de hasta 30.000 euros. Pa cualquier familia ye una carga durísima; pa quien vive con prestaciones básiques, ye directamente una conderga económica.

El casu del cobru simultáneu del Salaríu Social Básicu y del IMV foi especialmente sangrante. Munchos perceptores comunicaron cambios, fixeron les xestiones que se-yos pidieron y siguieron cobrando porque l’alministración nun paralizó pagos nin informó con claridá. Munches persones interpretaron lóxicamente que, si la propia alministración siguía ingresando eses perres -falamos de cantidaes que, incluso sumaes, son ruines-, yera porque-yos correspondía. Meses dempués llegó la reclamación.

Eso supón treslladar a la xente más feble les consecuencies d’una mala xestión pública. Nun ye razonable que quien sobrevive con menos de 400 euros per persona tenga qu’asumir errores informáticos, retrasos internos o falta de coordinación ente organismos. Menos entá cuando se fala de persones en riesgu d’esclusión social.

Asociaciones como Alambique llevaron esti problema al Defensor del Pueblu, que plantegó reformar el sistema de reintegru cuando l’error o la demora seya imputable a l’Alministración y fixar un plazu máximu pa reclamar cuantíes indebidamente percibíes. Ye una vía lóxica y necesaria. Si la propia Alministración falla, nun pue actuar años depués como si nada pasara.

Con esti sistema, al final, lo que se suponen drechos sociales acaben furrulando como préstamos con intereses, tornando la teórica protección social n’inestabilidá permanente. Lo qu’ufre el Principáu ye, ensin más, facilitar los sistemes de pagu.