Miembros del xuráu y echaores coles botelles finalistes.

Dos llagares de Xixón, un d’Avilés, dos de Sieru y un de Nava compatirán el miércoles 25 de marzu, a les 18:30 hores na Sidrería La Montera Picona de Ramón por algamar el títulu de la Meyor Primer Sidre l’Añu

Los seis llagares finalistes, escoyíos pol xuráu en tastia a ciegues, son: Contrueces (Xixón), Germán (Avilés), La Morena (Viella), Piñera (Xixón), Vallina (Sieru) y Roza (Nava), nuna edición na que participaron cerca de trenta productores.

El xuráu encargáu de la selección tuvo formáu polos sumilleres Xuacu Menéndez y Eugenia Castiello, xunto colos profesores Juan Luis García y Benedicta Furro, col sofitu del propietariu del establecimientu anfitrión, Emilio Rubio, y baxo la presidencia de José M. Busto. Les sidres foron escanciaes por Wilkin Aquiles y Alejandra Vanegas.

Amás del premiu principal —que da a la sidre vencedora la condición de sidre oficial del eventu— van concedese reconocimientos al segundu y tercer clasificaos. Como ye vezu, una vegada terminada la final, el públicu va poder probar les sidres que llegaron a esta última fase.

El certame, entamáu pola Fundación Asturies XXI, sigue consolidándose como ún de los más relevantes del país. La so singularidá ta en que ye l’únicu que valora la sidre sobre la madre, ensin trasegar, recuperando una práctica tradicional que cada vez suma más llagares interesaos na so ellaboración.

Más allá del concursu, la Primer Sidre l’Añu va desendolacase pente’l 2 y el 5 de marzu, convirtiéndose nun puntu d’alcuentru indispensable pa sidreros convencios y amateurs. Dientro d’estos díes destaca’l tradicional Sidracrucis del día 3, una de les actividaes más populares y participatives del programa.

This work is licensed under a Creative Commons Attribution 4.0 International License.