La Cultura Asturiana de la Sidre avanza nel camín de la profesionalización. Con esi envís ábrese la segunda edición del II Cursu de Sumillería de la Sidre, una propuesta formativa que busca dar un pasu más nel conocimientu, la tastia y la prescripción d’esta bebida identitaria

Participantes nel I Cursu de Sumillería de la Sidre

La Escuela de Sumillería de la Sidre de la Fundación Asturies XXI abrió’l plazu d’inscripción pal II Cursu de Sumillería de la Sidre, una iniciativa formativa pensada pa quien quieran afondar nel conocimientu del productu y na so correcha prescripción, valoración y serviciu.

El cursu, que va desendolcáse nel CIFP Hostelería y Turismu de Xixón, va entamar el próximu 19 de marzu y tendrá una duración total de 25 hores repartíes en diez sesiones. La iniciativa naz cola idea de dar continuidá al trabayu entamáu na primer edición y reforzar la formación especializada nuna bebida que forma parte esencial del patrimoniu cultural asturianu.

Una de les claves del programa d’esti segundu cursu ye’l protagonismu del panel de tastia, que furrula como exa vertebrador de la formación. Al traviés de tasties a cieges, muestres codificaes y fiches d’evaluación normalizaes, l’alumnáu aprende a identificar arumes, saborgos y matices de la sidre, asina como a detectar posibles defectos venceyaos a la ellaboración o al serviciu.

El panel ta dirixíu por Juan Luis García, profesor del CIFP d’Hostelería y Turismu de Xixón, y busca entrenar un criteriu sensorial rigurosu que permita describir y valorar la sidre con precisión. Nun se trata solo de tastiar, sinón de deprender a interpretar el productu con ferramientes téuniques y con un llinguaxe claru.

El programa complétase con intervenciones de profesionales venceyaos a distintos ámbitos de la sidra, la gastronomía y la investigación sensorial. Ente ellos ta Luis Benito García, direutor de la Cátedra de la Sidre de la Universidá d’Uviéu, que va abrir el cursu con una conferencia dedicada a los fundamentos de la Cultura Sidrera Asturiana.

Tamién participen especialistes como Donato X. Villoria, que va abordar la sumillería aplicada a la sidre; Esteban Blasco, enólogu del Llagar Valverán, que falará de la sidre de xelu; el investigador Marcos Abel Fernández, que va tratar el funcionamientu del sistema sensorial na tastia; o la química y enóloga Cristina Castaño, que va desplicar procesos formientativos y terminoloxía enolóxica aplicada a la sidre.

El programa inclúi amás sesiones dedicaes al analís aromáticu, maridaxes con sidre, talleres d’escanciáu y serviciu —impartíos pola campeona echaora Laura Ovín— y una visita técnica al llagar Valverán.

El cursu cuenta con un númberu llindáu de places —namás venti— col oxetivu de facilitar un trabayu práuticu cuidáu y un siguimientu cercanu del alumnáu. La organización da prioridá a los que yá realizaron el cursu básicu de sumillería, anque ta abiertu tamién a persones interesaes en dar un pasu más nel conocimientu de la sidre.

Nun momentu nel que la sidra gana presencia na gastronomía, la restauración y los concursos especializados, iniciatives como esti cursu reflexen l’esfuerzu por formar profesionales capaces de valorar y comunicar la sidre con criteriu, reforzando asina la cultura sidrera asturiana dende’l conocimientu y la práctica.

Susana Sela

This work is licensed under a Creative Commons Attribution 4.0 International License.