N’Ast denuncia que Foro ta algamando unos niveles d’antiasturianismu inxustificables dafechu.

La organización N’Ast fixo públicu un comunicáu nel que reacciona a la retirada del asturianu de la rotulación d’EMTUSA y carga con dureza escontra Izquierda Unida, a la qu’acusa de contradicción política y de nun impulsar la oficialidá ellí onde tuvo y tien responsabilidaes de gobiernu.

Nel so posicionamientu, N’Ast considera que lo asocedío confirma una idea que vien defendiendo dende hai años: ensin oficialidá, l’asturianu queda “a la voluntá del políticu de turnu”. El comunicáu afirma que la situación actual nun ye un fechu aislláu, sinón la consecuencia d’un modelu basáu en xestos simbólicos ensin garantía xurídica.

“La decisión de retirar l’asturianu de la rotulación d’EMTUSA vuelve poner enriba la mesa una realidá incómoda: ensin oficialidá, la llingua asturiana depende única y exclusivamente de la voluntá del políticu de turnu”, señala’l testu.

Crítica direuta a IU

La parte central del comunicáu incide na contradicción que, a xuiciu de N’Ast, representa la postura d’Izquierda Unida, formación que foi precisamente quien denunció públicamente la retirada del asturianu de los autobuses municipales.

“Ye precisamente IU quien denuncia agora la retirada del asturianu, cuando foi y ye parte de distintos gobiernos del Principáu y de múltiples conceyos ensin tener impulsao nunca de manera efeutiva’l reconocimientu plenu de los drechos llingüísticos”, afirma la organización.

N’Ast sostién que denunciar un retrocesu nun ye suficiente si nun s’impulsaron previamente midíes estructurales que blinden los drechos. “Denunciar el retrocesu ye fácil. Blindar los drechos cuando se tien responsabilidá de gobiernu ye lo verdaderamente importante. Y eso nun se fixo”, añade’l comunicáu.

El casu d’Illas

La organización tamién menciona’l casu d’Illas, conceyu gobernáu por IU, onde —según N’Ast— l’ayuntamientu “ñégase a almitir escritos presentaos n’asturianu”. Pa la entidá, esti fechu supón una contradicción evidente col discursu públicu de defensa de la llingua.

“Nun se pue denunciar la retirada del asturianu nun autobús y tolerar que s’impida l’usu de la llingua nun rexistru municipal”, recueye’l comunicáu.

Reivindicación de la oficialidá

El testu conclúi con una reivindicación clara: la oficialidá como única garantía estable pa la llingua. Dende N’Ast insisten en que la situación actual demuestra la fraxilidá del modelu actual.

“El problema nun ye una rotulación concreta. El problema ye que l’asturianu nun tien drechos garantizaos. Y mientres eso nun camude, cada avance va poder ser revertíu”, afirmen.

La organización zarró’l comunicáu con una apelación direuta a la responsabilidá política: “El pueblu asturianu nun necesita más indignación puntual. Necesita oficialidá. Necesita drechos reconocíos por llei”.

This work is licensed under a Creative Commons Attribution 4.0 International License.