L’activación de les subastes de parques eólicos marinos por parte del Ministeriu pa la Transición Ecolóxica prende les alarmes n’Asturies, onde colectivos sociales, el seutor pesqueru y Andecha Astur alerten va tiempu del grave impactu que la implantación d’esti tipu de proyeutos podría tener sobre la mar, la biodiversidá y les formes de vida venceyaes al litorál.
La planificación estatal prevé la concesión d’instalaciones eóliques offshore con una potencia total de trés gigavatios en 2030, incluyendo zones frente a la costa asturiana, una decisión que xeneró una fuerte contestación social.
El Plan d’Ordenación del Espaciu Marítimu del Cantábricu identifica trés grandes árees n’Asturies con supuestu potencial pa la eólica marina: una frente a la costa de Xixón y dos nel occidente, frente a Valdés, Navia, Tapia y El Franco. Estes zones, que sumen más de 300 quilómetros cuadraos, afeuten direutamente a espacios de gran valor ecolóxicu y pesqueru. Dende los colectivos críticos denúnciase que la instalación de fasta cien aeroxeneradores flotantes, a unos 21 quilómetros de la costa y con grandes bases clavaes nel fondu marín, supondría una alteración severa del ecosistema mariñu.
L’esmolecimientu nun ye solo ambiental, sinón tamién económicu y social. El seutor pesqueru considera que la eólica marina amenaza’l so mediu de vida, al introducir elementos industriales nuna mar de la que dependen cientos de families. Les vibraciones, el ruiu submarín, la ocupación de zones de pesca y los cambeos nel comportamientu de les especies son dalgunos de los riesgos señalaos polos profesionales del mar.
Los colectivos opositores recuerden que la vixente Llei 41/2010, de proteición del mediu marín, considera contaminación marítima cualquier introducción d’enerxía nel mediu mariñu —incluyíes les fontes sonores submarines— que pueda provocar daños a los recursos vivos, a los ecosistemes, a la pesca, al turismu o al valor recreativu de la mar. Al so entender, la eólica marina cumple estes condiciones, especialmente cuando s’implanta en zones incluyíes dientro de reserves pal caltenimientu de la biodiversidá marina.
Dende Andecha Astur denúnciase que’l modelu enerxéticu que se ta impulsando responde más a los intereses de grandes multinacionales que a una planificación racional del territoriu. La organización nacionaliega critica la política del Gobiernu de Barbón, que califica de sumisa a les decisiones tomaes en Madrid y carente d’una estratexa propia p’Asturies.
La formación vien reclamando dende 2023 una moratoria eólica y fotovoltaica que paralice nuevos proyeutos fasta disponer d’un Plan Estratéxicu de Recursos Enerxéticos, un Plan de Planificación del Territoriu y un Plan d’Ordenación d’Espacios Marítimos ellaboraos n’Asturies. Sicasí, denuncien que’l Gobiernu español aprobó’l Plan d’Ordenación Marítima de la Fastera Noroccidental —que inclúi tola costa asturiana— baxo l’argumentu de protexer los ecosistemes, cuando, na so opinión, acaba cediendo a les presiones de les grandes corporaciones enerxétiques.
Los críticos sostienen que les enerxíes eólica y fotovoltaica, tal como se tán implantando, requieren una ocupación masiva del territoriu y tienen efeutos irreversibles sobre’l paisaxe, los ecosistemes y la organización social del país. Defenden que cualquier producción enerxética tien de ser compatible col caltenimientu del paisaxe tradicional, de los montes y de les actividaes del seutor primariu, y reclamen que se prohiban esti tipu d’instalaciones en espacios naturales, paisaxísticos, patrimoniales o arqueolóxicos protexíos. Pel so llau, el Gobiernu del “Principado” demanda, como “refuerzu” de la rede eléctrica d’Asturies, conexones pa la eólica marina nel occidente, integrando esta pidición na so “Propuesta inicial de desendolcu de la rede de tresporte d’enerxía eléctrica con horizonte 2030”, que ta n’información pública.
L’activación de les subastes d’eólica marina abrió, asina, un conflictu de fondu n’Asturies. Frente al discursu del “crecimientu verdi” y les “oportunidaes industriales”, medra una oposición que ve nesti modelu una amenaza direuta a la biodiversidá, a la mar, a la pesca y al futuru del territoriu.
This work is licensed under a Creative Commons Attribution 4.0 International License.
