USO y UGT abandonen a los trabayadores nes sos vindicaciones, dimpuestos a aceutar un alcuerdu desfavorable cola empresa
Nun clima de creciente tensión llaboral, los trabayadores de Transportes Unidos d’Asturies (TUA), empresa concesionaria del serviciu d’autobuses urbanos d’Uviéu, anunciaron una fuelga de cinco díes como respuesta a lo que consideren un bloquéu absolutu nes sos reclamaciones y una actitú claudicante de parte de dellos sindicatos.
Les xornaes de paru, convocaes polos sindicatos CSI y CCOO, van celebrase’l vienres 30 de mayu y van continuar el 2, 6, 9 y 10 de xunu. Los trabayadores manifiesten que la situación ye incaltenible y que les sos demandes lleven siendo ignoraes dende hai tiempu.
Les reivindicaciones principales céntrense nel pagu d’hores estraordinaries y pluses, condiciones que —según denuncien— nun foron respetaes pola empresa. Amás, reclamen la retirada de cámares de seguridá que consideren invasives y un elementu de control constante sobre’l personal, nun contestu llaboral yá de por sí estresante. Un pidimientu tan básico como tener accesu a baños n’estaiciones clave sigue tamién ensin solución.
Nun xiru que munchos calificaron de traición, los sindicatos USO y UXT abandonaron el comité de fuelga tres aceptar la firma d’un alcuerdu desfavorable cola empresa, a pesar de que’l mesmu nun contempla les demandes principales del personal. Esta decisión amuesa, pa munchos, la desconexón d’estes centrales sindicales colos intereses reales de la plantía, priorizando la firma rápida d’un pactu por enriba de la defensa de los derechos llaborales.
Dende CSI y CCOO insisten en que esta fuelga ye una respuesta de dignidá y firmeza ante la falta de compromisu empresarial y la desmovilización interesada d’una parte del sindicalismu.
La ciudadanía d’Uviéu ta llamada a comprender el fondu del conflictu: una llucha por condiciones llaborales xustes, pola salú y dignidá de los conductores, y pola defensa de los servicios públicos dende la xusticia social.
Nel Dos Santos
This work is licensed under a Creative Commons Attribution 4.0 International License.
