Un añu más la formación nacionaliega homenaxeó en Deva al poeta que meyor definió coles sos pallabres la ideoloxía que’l partíu defende

Nel emotivu actu los presentes colocaron, cola gaita de fondo,claveles y felechos al pie de la placa que fae remembranza al autor, nel exterior del Cimenteriu de Deva onde ta enterráu. Anantes Llucía Fernández fexo una intervención na que remembró les pallabres del autor, recalcando que na so curtía vida el que yera conocíu comu Andresín de Deva fizo un descomanáu llabor de defensa del país dende toles estayes: en namás 29 años foi Poeta’l país, miembru fundaor y candidatu del Ensame Nacionalista Astur, profesor de llingua asturiana, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi ayalgueru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana.

El mensaxe que se llanzó foi el de la continuidá del llabor qu’Andrés fizo en vida y dexó indicáu nos sos poemes: seguir na brenga, seguir a la gueta d’un pueblu llibre y una Asturies dixebrá.

Testu de la intervención:

Equi tamos. Nun lo digo por dicir, nun ye una frase vacio nin una constatación a cencielles de daqué evidente. Equí tamos. Pesi a les zancadielles, la represión, los abandonos, los silenciamientos, les torgues… Equí tamos.

Pese a quien pese, que yos pesa a munchos, tamos equí y agora, dando la cara, reclamando un futuru dignu pa esti país, desixendo drechos tan básicos comu’l de la propia llingua, l’aire respirable o la vivienda.Tamos, como tuvimos, comu taremos. Hai que siguir, hai que siguir, diz Andrés.

Con equí quiero dicir munches coses. Por casu, que tamos otru añu remembrando, non la muerte, sinón la vida d’Andrés Solar, una vida tan curtía en llargor comu fonda en sentíu; En namás 29 años foi Poeta del país, miembru fundaor y candidatu del Ensame Nacionalista Astur, profesor de llingua asturiana, espublizó articulos en prensa, ganó premios lliterarios, foi miembru de l’Academia de la Llingua, collaboró col grupu Xaréu Títeres de teatru, foi ayalgueru de l’Asociación d’escritores Asturianos y miembru de Conceyu Bable y de Xunta pola Defensa de la Llingua Asturiana… pero sobre tou nel so díe ente díe, de fechos y de pallabra Andrés fizo país por tolos medios que pudo.  Andrés yera poeta, pero yera tamién muncho más qu’un escritor, yera un asturianu convencíu. Tamos falando d’una persona que sintetizó en cuatro versos tolo que ye la propuesta política d’un nacionalismu d’izquierdes:

Prúyemos un pueblu llibre,

que nome cola so voz

los sos collacios ya’l pan,

prúyemos un pueblu llibre

y una Asturies Dixebrá”.

Por ello ye que-y traigo esti mensaxe a Andrés, tamos equí, collaciu, seguimos nel camín que marcaste coles tos pallabres, equí, na llucha, equí, faciendo país, equí poniendo voz a un pueblu.

El verde y la gaita

Nin valen nin sienten

Si dientro del pueblu

Nun fierve la xente

Falando futuru

Al son de pallabres

Qu’el mesmu pariere

Pero’l pueblu vive

Si dientro tien xente

Cincando-y les uñes

Nel puelgu al silenciu

Esos somos nos. Los que fervemos, los que cincamos les uñes, los que seguimos. Los que nun camudaron el so discursu por que lu sentimos y porque lu sabemos ciertu. Los qu’estorbamos, porque al nun vendenos rescamplamos los que si lo ficieron. Los que nun sabemos rendinos.

Yo creo qu’Andrés taría arguyosu de nosotros, se que taría al par nuesu, cola so palabra clara señalando’l camín.

Tamos equí tamién pa quitar voz a los que quieren facer d’elli un asonsañu de si mesmu, retayando la so memoria. Apostaría que, de seguir vivu, munchos de los que-y faen homenaxes diben tar bien a la so escontra, porque Andrés yera, como nos, molestu. Molestu pa l’autoridá impuesta, estorbu pal hipócrita, incomodu pal aprovechau, pal falsu, pal cobarde, pal español.

Ya en vida, Andrés Solar topare col pilancu de quienes quisieron echar abaxo la so militancia política, malagusto pola so coherencia y la claridá de la so visión nacionaliega, que resumía con cenciellez visionaria no que siempres intentó desplicar a tolos que tenía alredor

Que la única forma lóxica de vivir n’Asturies ye siendo asturianu, ye lo único intelixente, porque, si nun apostamos nosotros polo de nos,  ¿quién lo va facer?

Pues tar tranquilu, collaciu, equí tamos.   

De siguir vivu Andrés, toi cierta, taría equí con nos. Non al par d’esti cimenteriu, pero si un pocu más pallá, igual tomando unos culinos, igual faciendo unes pintaes… por qu’elli tampocu se rendiría, tamién sabría, como ya dixo, qu’hai que siguir. Faigo miu’l so mensaxe y mándolu a tolos asturianos.

Toi buscando la manera de dicite
qu’hai milenta razones que se llamen como tu.
Y qu’esperen por ti, qu’esperen por ti.

A vegaes camiento cansáu
que nin siquiera sabrán que tuviemos equí,
asoleyando un país que cayó una nueche a la mar
, y na mar y na nueche lu quixeren dexar.

Nin siquiera sabrán que tuviemos equí
cola voz y les manes falando d’amor,
falando de ti, falando de ti. 

Pero ye igual,
hai que facer del argayu un fueu,
del vientu un hermanu qu’esparda’l calor,
qu’esparda’l calor.

Hai que siguir asina y equí.
Hai que siguir,
hai que siguir

This work is licensed under a Creative Commons Attribution 4.0 International License.