Asturies pierde un intelectual comprometíu col país; la sidre, un estudiosu y amante; el mundiu, una mente clara y rellumante; toos, un collaciu.

Anueche, a eso de les ocho, David M. Rivas Infante -a quien tuvi’l gustu de conocer- escribía nel so facebook “Lluna guarez Candanal, acompangada por un Xúpiter rellumante”.

Esta mañana aportaba la noticia de la so muerte, tan inesperada que munchos creyeron que nun yera sinón un fake que David sumaría a la so carrapotada d’anecdotes que siempres dexaba cayer pente pingarates de sabencia. Quiero creyer, viendo la so semeya de lluna enllena, que morrió col tastu reciente de la sidre o una copa nos llabios y una música entá sonando pente los sos cavilgos, compartios con Charo no alto de Candanal.

Llegó polo menos a ver declarada la sidre Padremuñu de la humanidá, nun pudo ver sicasí cumplía la so naguada oficialidá nin muncho menos la llibertá y dignidá que siempres reclamó pal pueblu asturianu.

Namás espero que tolo que sabía nun quedare pa prau, que se sientan les sos pallabres, que se llean los sos llibros, los asoleyaos y los que de xuru dexó per casa en milenta notes. Que seya etenru nes sos sabencies.

Un culín nel to honor, David.

This work is licensed under a Creative Commons Attribution 4.0 International License.