Nun mundiu toa vez más interconeutáu, Llar Folk surde como un oasis d’autenticidá, calteniendo y compartiendo les tradiciones asturianes con una audiencia global famienta d’experiencies creatives y significatives
Güei, l’aire ye más fresco n’Asturies. Llar Folk ta acabante ñacer y promete esenguedeyar los suaños, marcando un ritmu que mos lleva dica’l futuru, pero ensin escaecer lo que somos.
Tres d’esti proyeutu hai intensos momentos de planificación y trabayu, y un fondu sentimientu d’identidá. Los güeyos de los nuesos antepasaos acolumbren la estaya que ta se marcando, sollutándo que nun permitamos que l’alma d’esta tierra suma na escuridá.
Nun mundiu aú la globalización paez esborrar los raigaños, los proyeutos que beben de la tradición puxen con enerxía, aprofitando les nueves teunoloxíes pa esparder la nuesa cultura per otres fasteres. Destamiente, el Llar entama a esenduviellar les sos actividaes, qeu van dende clases maxistrales fasta prestosísimes rutes culturales, ensin escaecr festivales, talleres pa la reciella o nueches en danza. Nun se trata d’anular la tradición, sinon de facela espoxigar, enguedeyando la nuesa música, danza y tradiciones nos filos de la modernidá.
Braeramente, Llar Folk ye una ponte dende los raigaños fasta lo que ta por venir. Especialmente atractivu ye’l cursu qu’ufierten pa esti branu, con una serie de masterclass impartíes por profesores expertos en cada instrumentu (xiblata, vigulín, gaita, bouzoki, tin&low whistles, curdión, bodhrán y cantu). Nel cursu, dada día entámase un taller de ritmu asturianu d’una hora de duración.
Pa ello, cunten con un Abonu Llar Trad Fest Masterclass, qu’incluyi agospiu, xinta y un cursu intensivu de tres díes, más un cuartu día con Nueche de Conciertu. Les clases son maxistrales, impartíes por profesores expertos de renome internacional nel mundiu la música celta y tradicional, y somorguien a los participantes nun ambiente inmersivu perinteresante.
Cada día’l cursu entama con un taller de ritmu asturianu d’una hora de duracción, afondando nos ritmos, soníos y patrones musicales asturianos. Darréu, los participantes asistirán a les clases impartíes por profesores expertos nel instrumentu escoyíu, ensin escaecer la conexón colos profesores de baille y canto na sesión de Ritmu y Cantares.
Destamiente, los participantes van algamar una gran bayura de conocimientos, dende téuniques y melodíes fasta habilidaes interpretatives, harmóniques y matices estilísticos, tanto pa nivel de principiantes como intermediu o avanzáu. Les clases tan llimitaes a 15 escolinos, pa garantizar l’atención individualizada y la meyor esperiencia de deprendimientu.
Tres de la educación en llinia y les experiencies culturales inmersives, esta iniciativa busca esboroñar les barreres xeográfiques y llevar Asturies al mundiu. Nuna dómina que la globalización paez amenazar con homoxeneizalo too, el Llar garra les riendes y amuésase como un faru de diversidá y preservación cultural.
La reciella tamién tien el so llugar nesti proyeutu, porque tien el futuru nes sos manes. Conscientes de que la identidá se construye y permítemosser parte activa del mundiu, una parte importante de la so misión ye facer acordar los caricoses de la curiosidá na xente pequeño, pa integralos dafechu na comunidá. Poro, habrá narraciones, hestories, música, too camentao pa entamar una prestosa aventura de deprendimientu.
Ensin dulbia, Llar Folk ta llamáu a enllenar de vida les caleyes y los llugares escaecíos de la memoria. Ye’l fuelgu que necesitábamos, una manifestación de que les aiciones falen más altu que les pallabres. ¿Maxines una Asturies na que la xente vive les nueses tradiciones, coneuta con los habitantes de los pueblos, que siéntense arguyosos de ser quiénes son, planta árboles autóctonos, defiende la nuesa singularidá? Entós, tú tamién yes Llar Folk.
El mundiu ta mirando y Asturies álzase dende’l so raigame, acordando d’un llargu suañu. Allalantrón, la xente nagua por visitar llugares diferentes, deprender, baltir cola música. La semiente ta plantada. Agora, namái-y queda medrar.
Si quieres collaborar de manera activa, tamién puedes apurrir el to granín de sable pa financiar los costes, porque Llar Folk tien una estaya abierta pa recaudar fondos. ¡Sofita esta iniciativa, porque ye parte de ti!
Si quies saber más, entra na so páxina web: www.llarfolk.com
Susana Sela
This work is licensed under a Creative Commons Attribution 4.0 International License.
