Medra l’emplegu nel sector primariu y costrucción, cae na industria y sector públicu, con un llexeru xorrecimientu xeneral de más 500 emplegos y una perda constante de población n’edá de trabayar
Asturies sumó nel caberu trimestre 500 afiliaos a la seguridá social; entá asina, sigui teniendo los niveles d’actividá más baxos del estáu, unes tases de paru y de paru xuvenil inaceptablemente altes y un esmolecedor desemplegu de llarga duración, ensin escaecer que cuasique un 8% de les families tienen a tolos sos miembros ensin trabayu.
Destaca la perda d’empléu ente’l funcionariáu (-3.700), ensin que se sepa si esi retayu foi a parar a alministración, educación, sanidá, caltenimientu o cualesquier de los otros ámbetos d’emplegu públicu. Medra bultablemente l’emplegu na construcción (+7.100) y llama l’atención la meyora del sector primariu (+1.800); na otra man, el sector servicios pierde 1.300 trabayadores dempués de la puxanza vacacional navidiega y constátase un esmolecedor descensu del emplegu na industria (-7.100), un de los sectores con condiciones llaborales comparativamente meyores. El paru baxó en 6.600 persones.
Nesta noticia pudiera paecer qu’hai cifres que nun cuadren, como que con 500 emplegos creaos salgan del paru 6.600 persones, cuestión que se debe a la continua perda de población n’edá de trabayar, por mor del avieyamientu de la población y la emigración de los más nuevos. Per otra parte, resulta dificil conciliar les 53.400 persones en paru coles quexes de los empresarios por falta de man d’obra en sectores como la hostelería y la construcción, problema que quiciabes se resolviera con condiciones de trabayu dignes nesos sectores.
N’Asturies hai 398.800 persones ocupaes y 53.400 que nun llogren atopar empléu. Con una tasa de paru del 11,81% y del 28,63% ente la mocedá, la situación del mercáu llaboral asturianu caracterízase pola perda de población n’edá de trabayar (58.800 menos en quince años); la tasa d’actividá más baxa del estáu, 50,84%, ; un eleváu paru de llarga duración, qu’afecta a 25.500 persones; el 7,94% de los llares con tolos miembros en paru; unos valores de temporalidá (18,2%) qu’entá siendo hestóricamente baxos superen la media nacional (16,5%) por mor de la elevadísima tasa de temporalidá del empléu públicu; y con el 14,2% de les persones ocupaes trabayando a tiempu parcial, proporción que tiende a xorrecer (magar ser indeseyao pa la mayoría) y supera la media española (13,5%).
Nel Dos Santos
This work is licensed under a Creative Commons Attribution 4.0 International License.
