Tolos asturianos agradecemos la so actuación a Sergio Narciandi, Teunicu de sistemes de Xestión Ambiental y llicenciáu’n Xeografía ya Hestoria pola UNED, qu’entregó al Muséu arquelóxicu el torqués célticu qu’atopó en monte

Alcuentra una ayalga de gran valir de la época céltica y entrégala a Cultura pa que forme parte del padremoñu de tolos asturianos.

La noticia tendría de ser a cencielles l’hallazgu en si mesmu, un torqués, probablemente de plata recubiertu d’oru, en perfeches condiciones. Sicasí, lo que llama l’atención ye’l fechu de que l’operariu d’Asturagua, empresa contratá pol conceyu Peñameyera Baxa, qu’alcontró la primer pieza camín del trabayu, nun la guardare pa si, sinón que, cosciente del so peraltu valir, informó darréu al Muséu Arqueolóxicu d’Asturies pa que la recoyeren. 

La integridá de Sergio Narciandi contrasta cola cantidá d’espoliaores que queden pa si les pieces arqueolóxiques que topen -seique nun avecen ser de tanta emportancia-. En dellos casos ye pa vendeles, comu pue comprebase n’interné, ya que nin siquier s’escuenden pa ello, dau l’escasu o nulu control qu’esiste sobre estes actividaes, que dañen irreparablemente’l padremoñu ya’l conocimientu de si mesmos de los asturianos.

Sergio rastreaba’l percorríu de la trayía d’agua pa la llocalidá de Cavandi cuando pente los restos d’un argayu vio daqué rellumar y fue a por ello, cuntando que sedría un collar de cabra o cualisquier otra cosa perdía por un pastor o montañeru. La sospresa foi grande y cuenta qu’entardó cerca una hora mirando clisáu pa la pieza, que gracies a los sos estudios pudo identificar comu un torqués de la Edá de Fierro. Llamó entós al Muséu Arqueolóxicu, qu’informó a Cultura y esa mesma tarde l’arqueólogu Pablo Arias xunto cola directora del Muséu, Maria Antonia Pedregal, comprebaron y recoyeron l’hallazgu, alcontrándose amás otra pieza asemeyada en ciscos, al buscar depués onde se topó’l primeru.

Narciandi ta ciertu de que fexo lo correcho, “Si la xente queda con ello nun tendríemos padremuñu nin cultura” razonaba. Que valga d’exemplu. 

Alberto Rodríguez

This work is licensed under a Creative Commons Attribution 4.0 International License.