Pepe Alba: “La Via Charlemagne pondría a Asturies nel mapa européu”

  • 2 Avientu, 2022

InfoAsturies entrevista al doctor Xosé Alba Alonso sobro la rellación ente Asturies y la iniciativa Via Charlemagne.

“Facer comuña ente conceyos d’equí y acullá, echar andar intercambios, información, feries… refuercia les posibilidades y la identidá d’Asturies”

El profesor Alba ñació en Salas (1959), de familia somedana, ye Doctor n’Economía pela Universidá Autónoma de Madrid y Profesor d’Economía Aplicada de la Universidá d’Uviéu. Participó en delles asociaciones, l’Asturiana d’Amigos de la Naturaleza (ANA), Conseyu de Cultura Vaqueira y Conseyu Asturianu del Movimientu Européu, principalmente. Foi responsable de docencia ya investigación n’universidaes europees y americanes (Adam Mickievitz, Angers, Budapest, European Institut de Firenze, Ghent, Faro, La Habana, Central de Las Villas) y delles españoles (Alcalá, Autónoma de Madrid, Cantabria, etc.). Collaboró’n delles iniciatives polítiques y dio cuenta na Xunta Xeneral de temes al rodiu’l mediuambiente, el desarrollu o la llingua asturiana. Tamién foi’l voceru del conocíu “Manifiestu de Cuadonga”, un documentu de mínimos nacionales asturianos entamáu hai años por Andecha Astur. El doctor Alba tamién ye miembru y representante n’Asturies de l’asociación internacional Via Charlemagne.

 

  • En primer llugar, ¿pue remembramos la rellación hestórica qu’esiste ente Asturies y Carlomagno?
  • El casu ye que tando nes mesmes cróniques carolinxes nun ye tan conocía comu debiera. Pa entamar, hai que dicir que l’Asturorum Regnum yera la entidá política cristiana de más altor fora l’imperiu de Charlemagne. Y les rellaciones diéronse en varies estayes, per un llau, la ilesia asturiana plantó cara a la de Toledo al rodiu l’adopcionismu. Mesmu Charlemagne que so man drecha, Alcuin de York, sofitaron les idegues de Beatu de Liébana nel Conciliu de Frankfurt, nel añu 784, y tiense costancia de correspondencia ente los dos eclesiásticos. De siguíu, tán citaes nes cróniques d’Eginard ná menos que tres embaxaes d’Alfonso II, y non de rellenu, que tán bien ponderaes perriba d’otres.

 

  • ¿En qué consiste la iniciativa de Via Charlemagne qu’usté afala?
  • Trátase de trayer a los nuesos díes la idega de qu’hebio rellaciones perimportantes bien vieyes, ensin tener que se remontar al imperiu romanu, más de la metá de lo que güei ye la Unión Europea taba dientru’l mapa del imperiu carolinxu más el reinu d’Asturies. Esto vien a danos la posibilidá d’afondar en collaboraciones culturales y turístiques con una llóxica que completa la del camín de Santiagu, que ñaciera nesi amestamientu. Si esi otru camín lleva xente de tol mundiu a un puntu, Via Charlemagne fai de ponte ente Aquisgrán y dellos puntos, Asturies pelo que nos toca. Pon nel mapa tou un conxuntu de coses de valir que vienen de la dómina de los reis d’aquella.

 

  • ¿Quiénes son les mas y los pas d’esta iniciativa tan potente?
  • L’iniciativa Via Charlemagne échala andar una asociación con esi nome que surde en Reims, pero na que collabora xente abondo d’Alemania, Italia, Suiza, Nafarroa y Asturies. Tamién collabora Portugal, por mediu de nós, los asturianos, tando comprometía l’Universidá de Porto comu parte septentrional del reinu astur. N’Asturies tán formalmente comprometíos el gobiernu, los ayuntamientos de Xixón (que patrocinara unes xornaes), de Uviéu y Salas, que firmaren una carta d’intenciones y l’Universidá, que ye, quiciavis, l’institución que más punxo, sobre tou dando cobertura a la comunicación con varies conferencies a través de l’Estensión Universitaria, la primera na Fundación Valdés-Salas ya l’última’n Cangues d’Onís.

 

  • ¿Qué repercusiones llaborales, turístiques, culturales, polítiques… tendría n’Asturies la nuesa participación activa na Via Charlemagne?
  • Lo primero, permite encadarmar munches de les bones coses que tenemos. Equí hai monumentos reconocíos pola UNESCO, iniciatives d’ayuntamientos (Castrillón, Salas…) con feries medievales, grupos musicales comu Xistras, cómics comu los de la Crónica de Leodegundo, representaciones en 3D de frescos del arte asturianu, comu los que fizo’l diariu La Nueva España… Nun mos damos a valir, presumimos de coses secundaries y nun llucimos otres que son principales. Mesmu pal turismu non estacional y posáu (slow tourism) que pa un meyor compás con otres comunidaes que s’esparden pela costa atlántica. ente Oporto, Asturies y Aquisgrán. El facer comuña ente conceyos d’equí y acullá, echar andar intercambios, información, feries… refuercia l’aprovechamientu turísticu, pero failo, por demás, fora’l tiempu nel qu’agora s’amontonen los visitantes.

 

  • ¿Cómu tán recibiendo esta iniciativa los estremaos núcleos de poder políticu n’Asturies: conceyos, “Principado”…?
  • La verdá seya dicha, llevamos pa cinco años naguando pela Via Charlemagne dende’l Conseyu Asturianu del Movimientu Européu y nun somos quién a llograr un arranque de veres. Recibiéronnos siempres con perbones pallabres, ven bien la cosa… si alguien tira d’ella, pero nun cobren protagonismu. Tal paez que’l Camín de Santiagu, del que tanto refugaron munchos cuandu Ignacio Ruíz de la Peña se fartucó de trabayar por él, ye daqué que nun permite facer otra cosa. Ye comu si dalguién refugare comer pote porque-y gusta la fabada, son platos emparentaos, pero bien ricos entrambos. Lo mesmo pasa pa dos de les posibilidaes d’itinerarios lligaos al Medievu. Via Charlemagne nun va a l’escontra de ná, ye un complementu perinteresante a otres coses, mesmu de la ñatura, prehestoria, costa o deporte.

 

  • ¿Esta propuesta reforzaría o non la identidá cultural y llingüística? Nel so casu ¿cómu la podría reforciar?
  • Ye nidiu que cuantu se fale sobre temes que naide nun conoz (y vergoña ye que sea asina n’Asturies) va da-yos apreciu y tien de dar mayor arguyu de pertenencia a la comunidá. D’otra miente, tenémonos reunío con visitantes mayormente franceses, el so apreciu pelo que ven n’Asturies ye escomanáu, y siéntense bien, mesmo amestando llingües. Noël Orsat, por exemplu, nun volviera dicir “Gijón” dende que m’entrugara qué yera eso de Xixón que vía nos cartelos, pa él ye muncho más fácil de pronunciar. Pero tuve tamién en conversaciones ente xente que falaba francés, castellán… y asturianu, que nun fue mala cosa pa que s’entendieren. Nes actividaes desarrollaes usóse la toponimia orixinal, Santuyano, por exemplu.

 

  • Si, pa finar, quier amestar dalgún comentariu…
  • Fora lo que ta hestóricamente demostráu, hai otres munches coses que pudieren ser d’interés y mui vendibles turísticamente: el regalu qu’Alfonso II ficiere a Charlemagne, ná menos que la tienda-palaciu del xefe musulmán de Lisboa, tres la conquista la ciudá. O un broche, probatiblemente saxón, na tapa la Caxa les Ágates. O un matrimoniu del que dalgunos falen ente Alfonso II y Bertinalda, pariente de Charlemagne. Siempres pongo comu comparanza al Rei Arthur, que nun se sabe ónde tuvo’l reinu. De dos sieglos de reinu tenemos constancia material abonda, cróniques árabes, carolinxes y milenta coses que dan pa muncho. La cosa ye querer y trabayar.

 

 


This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies