Sidrocole nel C.P. Aniceto Sela

  • 21 Payares, 2022
Los Sidrocoles lleven doce años  llevando a les escueles, mercaos y folixes del país el so llagarín portatil, col oxetivu de que neños y mayores conozan más de cercael procesu d’ellaboración de la sidre

 

L’Aniceto Sela recibió esti añu por primer vegada a los Sidrocoles, dientro d’un bayurosu programa d’actividaes tradicionales serondiegues cellebraes nel marcu’l magüestu -cestería, esportes tradicionales, tallerín de productos agrícoles, música, esposición de setes, baille’l país…-.

A lo llargo’l taller, pel que pasó la reciella d’ente tres y doce años, los escolinos deprendieron a mayar en duernu y cola mayaora rabil, pa lluéu prensar la mazana nel llagarín portatil y esfrutar d’unos vasinos de perbona sidre’l duernu. Seique dellos rapacinos conocíen ya’l procesu, por facelo en casa, foron asgaya los qu’enxamás vieren comu se facía y abondos tamién los que, veníos d’otros países, vivieron la esperiencia comu daqué novedoso dafechu, amosando toos muncho interés y permitiendo coles sos entrugues afondar nel tema la sidre, la so ellaboración y la cultura sidrera asturiana.

Seique la mayada ye l’actividá de más sonadía dientro los Sidrocoles, nun ye la única. Deprender a echar sidre, llantar pumares en pebidales, reise y deprender colos xuegos de la sidre, visitar llagares o pumaraes, averase a los secretos de la tastia de sidre o conocer eses variedaes sidreres que son menos populares son dalgunos de los talleres que, en función de les edaes y los gustos, ufren los Sidrocoles.

Alberto Rodríguez

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies