Los asturianos mayores de 65 años tripliquen a los menores de 15
Nel caberu sieglu namás 7 conceyos medraron, los más grandes, pero tamién nestos la tendencia ye anguañu a la baxa: Xixón, Uviéu, Avilés, Mieres, y Llangreo fueron los conceyos que más población perdieron esti añu.
Nel añu que se cuenta con baxar del millón d’habitantes n’Asturies (cifra que nun se daba dende la década los 60) son setenta los conceyos que pierden población.
Nel caberu cuartu sieglu ocho municipios amenorgaron en más del 40% la so xente: Illano, Ibias, Pesoz, Degaña, Bual, Villayón, Grandas de Salime y Belmonte. Toos ellos nel Ocidente asturianu, mayormente, del surocidente, onde la poca rentabilidá del campu suma al preslle de la minería p’amenorgar les posibilidaes llaborales y onde’l desdexamientu de l’alministración tien más desantendies les necesidaes de la población. Tres d’ellos, los 28 que perdieron pente un 25% y un 40%, incluyendo dellos de les cuenques mineres, comu Mieres o Samartín; nesti rangu alcontramos tamién la totalidá de los conceyos de los Oscos.
Son necesarios 6.000 nacimientos al añu pa qu’Asturies entame a xorrecer, pero la natalidá, mui a la contra, sigui una llinia descendente. El mayor déficit de población ye la moza, los mayores de 65 tripliquen a los menores de 15 y la falta de perspeutives llaborales, con más de la metá de los asalariaos cobrando menos del SMI, la tendencia nun apunta cambeu. Con un xorrecimientu vexetativo deceleráu progresivamente durante tou’l sigelu XXI la dinámica apunta a pior, ensín que se vea utilidá a los millones invertíos en polítiques de llucha contra la crisis demográfica.
Pa la formación política, non solo ye preciso tomar midies que fomenten la natalidá (ello ye, favorecer l’acesu a la vivienda y a trabayos dignos de la mocedá) sinon que ye perimportante ufrir a les centenes de miles d’asturianos desplazaos -la mayoria con un perfil d’alta formación- “la oportunidá de tornar al país, garantizándo-yos el mediu de vida y qu’al tornar atoparán, non solo un trabayu, sinon los servicios, los drechos ya infracadarmes que s’esperen nun país desendolcáu del sieglu XXI”
Nuria Prendes
This work is licensed under a Creative Commons Attribution 4.0 International License.
