• Portada
  • >
  • Llingua
  • >
  • Andecha Astur considera inxustificable la inxerencia gallega na tema llingüística

Andecha Astur considera inxustificable la inxerencia gallega na tema llingüística

  • 13 Xineru, 2022

La formación nacionaliega lleva tiempu denunciando’l pelligru d’utilizar la denomación “gallego asturiano” pa referise a la fala del ocidente d’Asturies

Recién salió a la prensa la intención l’Academia Gallega de que’l gallegu -una llingua que nun se fala n’Asturies- se reconoza como llingua oficial en territoriu asturianu, de la man y al nivel del asturianu. La hestoria de los intentos de galleguización del ocidente asturianu remóntase a tiempos de Manuel Fraga, pero les declaraciones colonialistes de l’Academia de la Llingua Gallega -RAG- van un pasu más alla, costituyendo lo qu’Andecha Astur considera “un acosu impropiu d’una istitución académica cuya actitú debería tar sofitá nel respetu, na non agresión y na respetabilidá científica”.

Andecha Astur ya denunciare l’erru d’utilizar la denominación de la fala del ocidente como gallego-asturiano, asina comu la so consideranza como una nuna nueva llingua estremada del asturianu, non solo porque a nivel llingüísitcu nun tuviere xacíu, sinón porque temíen que fore una puerte abierta al espansionismu galleguista.

Andecha Astur acusa a l’Academia de la Llingua Asturiana –ALLA- de claudicar a les presiones de la FSA-PSOE no que pa ellos supón “non solo una agresión a los falantes d’esa variedá, sinón el vistu bonu a la continua inxerencia galleguista nesos territorios, talamente como acaba vese confirmao”. Poro, piden a l’ALLA que torne a la so postura inicial de considerar una variedá del asturianu a la fala.

Destaquen tamién la falta de poder políticu del “Principado” frente a Galicia, amás de los fautores demográficos, socio-económicos y sociollingüísticos de la fastera afeutada que faen vulnerable la fala ocidental asturiana, alvirtiendo que tou ello xuega a favor d’una fagocitación progresiva de la mesma por parte’l gallegu.

La vindicación hestórica d’Oficialidá de la llingua asturiana en tol país y de toes y cauna de les variedaes llingüístiques del asturianu nos sos respeutivos territorios ye una de les costantes nos programes elleutorales y campañes del partíu, que considera la pluralidá llingüística del asturianu comu “la espresión de la so vitalidá y garantía de persistencia”.

Nuria Prendes

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies