Secretos a voces: Villa y la mafia de la UXT/PSOE

  • 20 Agostu, 2021

 

“Fernández Villa nun yera un lladrón qu’actuaba en solitariu, él yera un capo, y como bon capo nunca trabayaba solu nin desarimáu”. El testimoniu de Pablo Alvarez Fernández esclarez los aspeutos más conocíos y más callaos del dirixente sindicalista

Recoyío en “Oruba.es, realidád incorruptible”

Testu: Pablo Álvarez Fernández.

Malpenes tenía 15 años cuando conocí a Fernández Villa. Entós daquella vivía cola mio familia n’un de los edificios qu’el Montepío de la minería construyera en La Felguera, una vivienda a la que pudiéramos optar por cuenta de la condición de vilba de mineru de la mio güela.

Nel bloque, sacante’l mio pa y el vecín de riba, toos yeren mineros y, siquier eso paecíame a mi, casi toos cortaos pol mesmu patrón. Homes axataos pero nobles que reflexaben na so mirada la durez del so oficiu y que teníen como seña d’identidá’l nun agachar la cabeza énte nada nin énte naide. Pero tou esa firmeza físico y moral derrumbábase cuando se cruciaben con él. “El tigre”, asina lu llamaben ellos, viniera vivir a un edificiu cercanu al nuesu y, anque malpenes alternaba, yera avezao velu baxar d’un touterrén enorme siempres acompañáu pol so guardaespaldes. Yera poner el pie nel suelu y los mineros de la so cuerda abandonaben les terraces de les sidreríes de la zona pa correr a combayar y rindi-y pleitesía. Un saludu del capo alzaba l’autoestima, el caxé social y les probabilidaes de tener una vida llaboral sele y una prexubilación xugosa. Él yera’l xefe, toos lo sabíen.

A mi facíaseme estraño qu’aquel tipu tan menudu espertara tanto mieu y almiración ente’l vecinderu. Facíaseme imposible qu’aquel señor de bigote acopara les portaes de los medios de comunicación rexonales. Hasta qu’un bon día afayé la razón, hasta que daquién me cuntó quién yera realmente “el tigre de Tiuya”, daqué que nun foi difícil porque toos lo sabíen.

Villa, la so guardia pretoriana, y la fuerza de los miles de mineros a los que, con dineru y prexubilaciones, presllare la boca (casi al empar que los pozos), teníen bien de poder. Controlaben el PSOE asturianu, adulteraben elleiciones, poníen y quitaben políticos —dende’l presidente d’Asturies hasta l’alcalde del pueblu más remotu, naide escapaba al so poder—, asitiaben a los suyos nos conseyos d’alministración, xestionaben fondos y subvenciones, controlaben la formación y l’empléu, interveníen na Caxa d’Aforros, influyíen nes decisiones de les grandes fortunes empresariales  etcétera. Y sí, toos lo sabíen y toos calláben, porque collaborar con él y tener el so favor yera asegurase’l futuru, porque tolos que-y facíen el trabayu puercu teníen pagu, yá fora en forma de categoría profesional n’HUNOSA, de conceyalía nun conceyu, o de xalé a bon preciu en Tapia de Casariego.

Agora, cayíu en desgracia’l capo, toes esos aguarones abandonaron el barcu, y carguen contra aquel que los caltuvo a flote tantos años, agora toos lu xulguen, toos lu falten, toos lu niéguen, toos asonsañen nun conocelu nunca, toos, ensin esceición. Dende esa abogada novata a la que tuteló hasta convertila en conseyera, o esi peritu de mines al que repatrió p’acabar convirtiéndolo col tiempu en presidente d’Asturies, o esi conseyeru que consiguió prexubilar a la so sobrina n’HUNOSA ensin triar la empresa más que’l primer día, o esi sindicalista de raza al que-y asitió a la fía nel partíu y al neñu nel sindicatu, ensin tener nin una nin otru nengún bagaxe profesional, o esi otru que controlaba les tarxetes de creitu del sindicatu y que se fixo ricu gracies a la brillosa xestión económica de les barres de Rodiezmo, o esa otra que mandó a la neña a estudiar colos gringos ”financiada” pola Caxa d’Aforros.

Fernández Villa nun yera un lladrón qu’actuaba en solitariu, él yera un capo, y como bon capo nunca trabayaba solu nin desarimáu. De la mesma manera que nun podríamos dixebrar a Vito Corleone de Tom Hagen o Clemenza, tampoco podríamos desligar la trayectoria de Villa de la de los sos consiglieri. Namás hai una diferencia, nel mundu del hampa hai unos códigos d’honor infrayable, un honor del que los soldaos de Villa escarecen, porque, anque paeza mentira, hasta para ser un mafiosu hai clases. Y sí, anque agora se niegue ¡toos lo sabien!

Testu: Pablo Álvarez Fernández.

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies