• Portada
  • >
  • Llingua
  • >
  • Mertxe Aizpurúa Arzallus, diputada d’EH Bildu “L’Estáu español conculca la llegalidá Europea en materia llingüística”

Mertxe Aizpurúa Arzallus, diputada d’EH Bildu “L’Estáu español conculca la llegalidá Europea en materia llingüística”

  • 8 Marzu, 2021

La proteición del Asturianu y les otres llingües minorizaes del Estáu llega al Congresu de la man d’EH Bildu, compañera d’Andecha Ástur na coalición Agora Repúbliques, cola presentación mañana nel Congresu d’una Proposición non de Llei en defensa de les llingües minorizaes del Estáu 

El Grupu Parlamentariu Euskal Herria Bildu, Grupu Parlamentariu Republicanu, Grupu Parlamentariu Plural, Grupu Parlamentariu Vascu (EAJ-PNV) y Grupu Parlamentariu Confederal de UP-En Comú Podem-Galicia son los firmantes d’esta PNL en defensa de la realidá plurilingüe del Estáu español, cola que se intenta consiguir que les llingües propies estremaes al castellán tengan la so mesma reconocencia y los mesmos drechos y deberes que la llingua oficial de tol Estáu.

La Proposición non de Llei básase nel manifiestu Pluralidá llingüística: llibertá, igualdá y democracia, presentáu por delles asociaciones que trabayen en defensa de llingües minorizaes pol estáu: l’asturianu, l’euskera, l’aragonés, el gallegu ya’l catalán —Iniciativa Pol Asturianu, Kontseilua, Nogara, A Mesa Pola  Normalización Llingüística, Acció Cultural del País Valencía, Ciemen, Escola Valenciana, Ómnium y Plataforma per la Llengua— y recueye 6  compromisos concretos para la protección y dignificación d’estes.

 

Entrevistamos a Mertxe Aizpurúa Arzallus, diputada d’EH Bildu y una de les persones que trabayó na redacción d’esta PNL

¿Cómo surde esta Proposición?

En principiu sofitamos los pidimientos que nos fixeron diez asociaciones, d’Asturies, Galiza, Euskal Herria, Catalunya y Aragón, que s’axuntaron con estremaos partíos para tratar la tema de la situación de les llingües minoritaries dientro l’Estáu Español. Nesi conceyu desplicáronnos la situación na que s’atopen estes llingües y presentáronnos el manifiestu Pluralidá llingüística: llibertá, igualdá y democracia, qu’axunta seis compromisos concretos pa garantizar esa realidá plurilingüe y que se van aldericar esti martes nel Congresu.

Tamién nos recordaron la menacia de regresión nesta tema pola presión per parte de la drecha, que ta precisamente afalando esta discriminación.

La situación vien de lloñe, hai yá 20 años que l’Estáu Español robló la Carta Europea de les llingües minorizadas y non solo eso, sinón que la ratificó, alquiriendo’l compromisu de cumplir los sos  dictames.

Sicasí, en tolos controles de siguimientu que se fixeron, les cinco evaluaciones que tuvieron llugar nesti tiempu, siempres s’atopen falles y repítese la necesidá de cumplir con esos encamientos, precisos y claros, que la Carta Europea fai y dende Europa desíxese-y al Estáu Español, como firmante, que se tomen les midíes para cumpliles, modificando si ye necesario pa ello les sos lleis.

Na atención al ciudadanu, por casu, na Seguridá Social, o nel ámbitu de la Xusticia… l’Estáu tien que faer prevalecer el drechu a l’atención nestes llingües y faer  prevalecer les capacidaes llingüístiques na contratación de funcionariao.

Solicitamos amás que s’impulsen y apreben les reformes necesaries para facer oficiales aquelles llingües qu’entá nun lo son, como ye’l casu del asturianu.

 

Esta solicitú ¿Ta roblada por tolos grupos a los que se presentó o dalgunu de los partíos negar a roblala?

Presentóse a práuticamente tolos grupos, toi cierta de que, por casu, al PSOE presentóse-yos y decidieron nun apautase.

¿Qué perspeutives teneis?

Tarrecemos qu’esta Proposición Non de Llei nun va salir alantre, porque’l PSOE y les dreches van oponese, pero entá asina abúltanos que la importancia d’esta tema merecía siquier que lleváramos l’alderique al hemiciclu.

¿A que se debe esta oposición tan ferrea a una cuestión llingüística, aparentemente inofensiva y de drechu?

Lo de los grupos de la drecha queda esplicao per se, ellos siempres van intentar faer  prevalecer la llingua del imperiu, nun estraña.

Per parte del PSOE, recai nes sos continues contradiciones. Na defensa del castellán escaecen los drechos y defensa d’otres llingües y de los sos falantes. No fondero, eso ye un fraude, yá que roblaron la Carta Europea de les llingües Minorizaes, colo que’l PSOE tien la obligación de dar, non solo proteición, sinón respetu, y al nun faelo ta conculcando los drechos de les ciudadaníes con otres llingües.

Dende Asturies tenemos la idea de que la represión que sufrimos débese a la falta d’Oficialidá, pero polo que nos cuntes nun ye muncho meyor para los idiomes oficiales…

Nel nuesu casu, ye imposible poder llegar a l’alministración del estáu y comunicase n’euskera. En xusticia, na Seguridá Social, en tou aquello que depende del Estáu ye la so obligación dar atención n’euskera a quien quiera falar en euskera, y esto nun ta asocediendo.

Pa esta discriminación ampárense na llegalidá, la Costitución, la Llei orgánica del Poder Xudicial… pero como bien yos recordaron dende Europa, tienen de camudar la llei, si ye contraria a lo roblao, hai una necesidá de modificar estes lleis pa que s’afaigan a lo comprometío na Carta Europea de les Llingües Minorizaes.

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies