• Portada
  • >
  • Asturies
  • >
  • Trescurríu’l plazu dáu pola Comisión Europea, los túneles asturianos siguen ensin iguar

Trescurríu’l plazu dáu pola Comisión Europea, los túneles asturianos siguen ensin iguar

  • 17 Febreru, 2021

El 14% de les carreteres asturianes costitúin “puntos prietos” d’altu riesgu, dos trabayadores acaben de finar pola desidia d’una alministración que conocía’l peligru y ignorolu deliberadamente y los túneles de les autovíes asturianes -incluyía la que cobra’l pasu de los asturianos a la Meseta- lleva más de 16 años ensin facer les igües que la Unión Europea desixe dende hai más de 16 años

Nun se conocen planes d’obra pa los túneles nin para dengún de los munchos puntos d’altu riesgu de la rede viaria asturiana, incluyía la carretera al Puertu Braña, recién escenariu d’un tráxicu acidente nel que perdieron la vida dos trabayadores. En concretu nos túneles falten ventiladores, les galeríes d’escape son insuficientes o nun tán en bones condiciones, los firmes nun son ignífugos, hai que completar y reparar la señalización, amás d’añedir opacímetros, videoxixilancia y demás equipamientos que desixe la UE na so normativa de seguridá aprobada nel 2004 y nel so Real Decretu de 2006.

En total, son 24 los túneles d’autovía que se deberíen reformar va 16 años, y atópense nes autovíes del Cantábricu (A-8), Ruta la Plata (A-66), la Uviéu-Villaviciosa (A-64), la del surocidente (A-63) y l’autopista’l Güerna (AP-66).

Dende los Presupuestos Xenerales del Estáu de 2018 esisten fondos conseñaos pa la cuestión, con un desembolsu envaloráu p’Asturies que ronda los 50 millones d’euros. N’esi presupuestu nun s’inclúin los otros 52 millones necesarios pa reformar l’Autopista’l Güerna, yá que ta entá abiertu l’alderique sobro quién tendrá de faese cargu de los costos, Aucalsa, beneficiaria de la mesma, o los asturianos que paguen a diariu pa salir del país; la empresa yá dio’l so veredictu: o pagamos los asturianos al traviés del Principáu o facémoslo al traviés d’una nueva xubida nos peaxes d’una de les poques autopistes qu’entá son de pagu en tol Estáu.

Tres la llamada d’atención al respeutu de la Comisión Europea a finales del añu pasáu, Fomentu cuntaba con un plazu de dos meses pa notificayos “les midíes adoutaes pa correxir la situación”. Nesi tiempu nun se tomo dala midía y l’últimu proyeutu conocíu al respeutu data del 2006; una vegada trescurríu esti plazu entramos na siguiente fase, esto ye, l’aprobación d’un dictame motiváu,  que vuelve especificar al Ministeriu de Fomentu qué túneles tien de reformar ensin falta, una especie d’ultimátum previu a la denuncia énte’l Tribunal de Xusticia de la UE coles correspondientes sanciones.

Llucía F. Marqués

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies