Entrevista a Fernando González, resistiendo tres de 34 díes en fuelga fame

  • 15 Xuño, 2020

El conflictu d’EBHI trespasa fronteres y lleguen sofitos dende estremaes partes del mundiu, pero’l gobiernu asturianu y español siguen faciendo oyios sordos, demientres la salú de los fuelguistes va deteriorándose y los plazos van escosando. Tres de 34 díes en fuelga fame, dempués de perder más del 20% de masa corporal y con tres collacios hospitalizaos ye inevitable que Fernando González, el caberu de los fuelguistes en resistir, s’entrugue qu’escuros porgüeyos s’escuenden ante esta reticencia a solucionar el conflictu. Sicasí, ta dimpuestu a esgotar tolos plazos

 

Seique pali que pali la vuesa situación va faciéndose pública, el tabicamientu y terxiversación por parte los medios de comunicación ye tremendu, polo que pa entamar convídote a facer un resume de lo que vos llevó a tomar la decisión d’aniciar esta fuelga.

Cuando’l pasáu 13 de Mayu nos empresllamos nes oficines d’EBHI y entamamos esta fuelga de fame teniemos mui clara la causa pola que llegábemos a esta midía tan estrema y esa causa nun ye otra que’l forzar a la empresa que cumpliera los sos acuerdos y la llei y solicitara la tasa reposición correspondiente al añu 2019. Esi ye l’únicu motivu pol que tamos equí, asina lo dexemos claro dende’l primer momento na nota de prensa, bien clara, en mayúscula, surrayao, y lo que vino dempués fue que los medios de comunicación quisieron tracamundiar les nuestres vindicaciones y paez que tamos equí pol malditu ERTE cuando’l tema de perres importanos bien pocu. Tamos equí polos despidos de 7 compañeros que van ser dispidios si la empresa nun pide esa tasa de reposición, aprovechándose de la coyuntura del COVID 19, a pesar de ser una empresa pública. El motivu únicu ye intentar d’evitar esos 7 despidos en diferío que va llevar a cabu la EBHI col vistu buenu de los responsables políticos que tien esta empresa, que ye’l gobiernu del Principáu d’Asturies.

Ta nidio que’l non cumplimiento del 100% de la cuota reposición supón la perda de puestos de trabayu, pero tres d’esto ¿nun s’albidra un plan gubernamental pa presllar la EBHI y dexar esti seutor en manes d’otres empreses privaes?

Mentantu siga abierto ARCELOR nun pue presllar EBHI, ye inviable. El tema la privatización ya ye otra cosa. Fae munchos años que’l PSOE ya’l PP cuando camudaron la llei de puertos yá metieron un artículu nel que prohibíen a les Autoridaes Portuaries tener acionariáu n’empreses nel seutor.

L’únicu casu en tol estáu ye’l de la EBHI, ya hebio dellos intentos de privatización, pero dengún salió alantre y agora mesmo ta parao’l tema. Entendemos que polo menos a curtiu/mediu plazu nun creyemos que se lleve a cabu esa privatización, porque la EBHI perdió muncho valor, cola pérdida total del carbón térmicu y ye muncho menos rentable. Prauticamente ya l’únicu cliente o cliente mayoritariu ye ARCELOR y nesi sen ye una empresa menos rentable, menos golosa pal capital privao; pero siempre tendremos ehí eso, la espada de Damocles de la privatización.

Lo que ta claro ye que lo que ta intentando l’Autoridá Portuaria ye descapitalizar EBHI. Tráficos que tendríemos  que descargar nosotros, porque somos la principal terminal granelera de tol estáu tan desviándolos a l’ampliación del Muelle Norte.

Entendemos que por dos motivos: xustificar esa ampliación, que fue un despropósitu que, que nun tuvo sentíu ningunu , necesiten da-y un usu, aunque seya un usu non real, pa que se vea qu’ehí hai una actividá

Ta claro que tien qu’haber negocios pente Autoridá Portuaria, FSA, el gobiernu del Principáu y empreses privaes portuaries, porque nun ye normal que se te potenciando esa actividá nel Muelle Norte con consignatarios privaos, cuando tu yes dueñu d’una terminal pública y tas quitando trabayu a esa terminal pública pa potenciar el trabayu n’eses empreses consignataries privaes.

 Prestaríame que dalgún díe daquién investigare y pudiera probase algo, la verdá ye que son entrugues lo que nos facemos, ta claro que nun tenemos preba denguna pero entendemos que pueda dase’l casu de qu’haiga negocios o intereses que nun sabemos cuales son ente la direición de l’Autoridá Portuaria, la empresa NMR, una empresa nueva equí nel Musel que mueve carbón, les consignataries privaes, l’ampliación…

Ye un tema que taría mui bien que daquién pudiere investigar fonderamente.

 

Depués de 34 díes de fuelga fame, coles movilizaciones diaries, barricaes, manifestaciones y demás ¿Cúal ye la situación actual?

La situación del conflictu nun camudó prauticamente nada dende qu’entamamos. Cuando entamamos la fuelga fame y l’encierru teníemos claro que l’oxetivu yera presionar a los responsables políticos d’esta empresa, que son el gobiernu del Principáu mediante la so Conseyería d’Industria, porque toles víes de diálogu, tanto cola empresa comu col acionista mayoritariu que ye l’Autoridá Portuaria taben presllaes. Entos xugámonoslo todo a qu’esos políticos movieren ficha y dieren les istruciones necesaries pa iguar esti problema cuantu anantes.

34 díes depués la empresa al nun recibir eses istruciones de los sos responsables políticos sigue nel mismu puntu.

Lo que ye increíble ye la actitud del Principáu  d’Asturies, a quien nun importamos absolutamente nada, nun y importa la salú d’unos trabayaores d’una empresa pública.

Por intereses ocultos qu’entendemos que tienen mutuos cola Autoridá Portuaria tan poniéndose de lláu, tantu Adrián Barbón como’l direutor xeneral d’industria, tan mirando pa otru lláu, dexando pasar los díes y ta claro que nun van facer na por solucionar esto.

 

¿A qué considerais que se debe la falta d’enfotu d’EHBI en buscar una solución?

Dende qu’al entamu de la fuelga nos punximos en contautu oficial tantu con presidencia comu con Conseyería  d’Industria pa que mediaren nesti asuntu la única rempuesta siempres fue derivar a la empresa al SASEC, qu’ehí se solucionaba tou, cuando esti conflicto vien d’un incumplimiento de la empresa d’un alcuerdu firmáu entre comité y empresa nesi SASEC al final del conflictu del 2017.

Insistimos y insistimos y la rempuesta d’Industria siempres fue SASEC, SASEC, SASEC. El comité aconceyó unes cuantes vegaes. El comité fue unes cuantes veces cola empresa, güei mesmo tan aconceyaos otra vez. La empresa si ye verdá qu’unes vegaes fue, otres vegaes alegando sabotaxes, poniendo disculpes, nun fue y fue allargando los díes, y a día de guei ta claro qu’esa falta d’enfotu de la empresa por solucionar esto fue claro.

Ellos Tuvieron una mui bona noticia y ye que’l unu de xunu entamó a cuntar el plazu alministrativu que quedó suspendíu col estáu d’alarma y entós saben qu’el díe 17 ye l’últimu díe llegal pa solicitar esa tasa de reposición. Entós, nel momentu que conocieron esos tiempos tan xugando a allargar esos plazos pa escusar el periodu. Nosotros cuntábemos con qu’esi plazu entamaría a cuntar una vez que finare esti estáu d’alarma y bueno, les coses nun salieron así. Como munches veces pasa, paez que tou se pon a favor del capital y la empresa y nesti casu pasó.

Aparte d’ello ta claro que la empresa vióse respaldá pol gobiernu del Principáu d’Asturies, ficieron piña. Así lo demostró la declaración con rabia del vicepresidente Cofiño na Xunta del Principáu, tienen tol sofitu del gobiernu pa ser inamovibles y facer con nosotros lo que quiera  y despidir trabayaores d’una empresa pública y facer menguar la plantiya, aunque Pedro Sanchez en Madrí diga que nun se pue utilizar la crisis del Covid 19 pa destruyir emplegu.

Esa ye la hipocresía del gobiernu.

Nes vueses pancartes y pintaes ye recurrente l’acusación a Barbón comu responsable de topar solución al conflictu ¿Cuál ye la relación del Principado con EBHI?

EBHI ye una empresa perteneciente al sector públicu, el so accionista mayoritariu, con un 68’2, más un 2% que tien na otra cartera de la mesma EBHI, o sea, un 78’2% de capital públicu, pertenez a la Autoridá Portuaria de Xixón y la relación que tien el gobiernu asturianu ye que toles comunidaes autónomes son les que nomen a la presidencia de cada Autoridá Portuaria

El gobiernu del Principáu d’Asturies ye’l que noma a déu el presidente y direutor de l’Autoridá Portuaria de Xixón. Poro son los responsables políticos finales d’esta empresa, ya que Laureano Lourido como presidente de l’Autoridá Portuaria ye tamién el presidente d’EHBI. Colo cual, Adrián Barbón ya’l so gobiernu tien la potestá de si nun cumple cola llinía política marcada pa esta empresa, cesalu, poner otra persona o day les ordenes que tenga que dar. Nesti casu la rempuesta del gobiernu socialista de Barbón fue la contraria, alinease con Laureano Lourido y da-y la razón y consentir lo que va pasar n’EBHI, qu’esti conflictu s’allargue indefinidamente, poniendo’n riesgu la nuesa salú y tar d’alcuerdu nunos despidos y nuna mengua de plantiya d’EBHI

La responsabilidá final ye política, ellos sabrán el porqué. Esperamos que más pronto que tarde podamos saber cual ye’l so motivu y cualos son los negocios o lo que tienen ente manes.

¿Qué opinión vos merez el fechu de que’l presidente miague por competencies onde nun les tien (desescalada, por exemplu) al tiempu que nun usa les competencies que tien pa desbloquear el conflictu d’EBHI?

Pues hipócrita, igual d’hipócrita que los anteriores gobiernos del PSOE n’Asturies. Si dalguien pensaba que Barbón representaba aire nuevo, na FSA, nel PSOE, que diba dar un xiru a la política socialista n’Asturies, pues con esti conflictu yo creo que quedó mui claro que ye más de lo mesmo. Asina lo dexó clarísimo Cofiño na intervención de la semana pasada, la postura de Barbón ye la mesma qu’habría tenido Javier Fernández, quedase mudu, ponese de perfil , echar balones fuera… nun camudó res.

Col tema les competencies tenemos mui claro cual ye la llinía del PSOE, non solo n’Asturies sinón a nivel estatal nesi sentíu, centralizadora total, y esti problema nuestru si que tien muncho que ver cola falta soberanía. Ye mui triste qu’una empresa asturiana toles decisiones tengan que pasar por Madrí. Toles autorizaciones de los nuesos convenios tienen que pasar por Madrí, a pesar de qu’eso nos llevó a otru conflictuc omu que lo que taba firmao equí ente comité y empresa nun lo autorizaren allí. Entendemos que nun se puede dirixir una empresa a 500 km, ensin saber siquiera les persones que tomen la decisión onde ta EHBI, nin lo que ye nin a que se dedica.

Vivimos nun estáu centralista onde paez qu’en Madrí son más intelixentes, más llistos, más altes, más guapes, más de too que nel restu y les consecuencies son estes, que tan consiguiendo qu’apaezan problemes graves onde nun los tenía qu’haber. Ye a lo que nos lleva la falta de capacidá pa tomar decisiones y de xestionar los nuesos recursos dende equí.

¿Qué sofitos tuvisteis a nivel políticu?

Teníemos mui claro que tantu la drecha, na qu’incluyimos el PSOE, comu’l facismu nun diben facer nada, pero si que tamos un pocu estrañaos que la otra organización que se diz d’izquierdes, comu ye IU, ten de la man del so amu, del PSOE, Sabemos qu’IU lleva munchu tiempo siendo la muleta del PSOE n’Asturies y nin siquiera se punxeron en contautu con nosotros, nin ningún xeitu nel auntamientu nin nel Principáu, paeznos estraño.

La organización con presencia institucional nel ayuntamientu y nel Principáu que vinieron a interesase por nos fue Podemos. A  nivel de Madrí , la nuesa reivindicación llegó a manes del vicepresidente del gobiernu y él treslladólo al ministru responsable de puertos del estáu, Abalos. L’Autoridá Portuaria del estáu púnxose’n contautu con Lourido. Pero nesti casu, al ser un gobiernu en coalición, dende UP tienen poca capacidá de presión nel ministeriu y lo que nos treslladen ye que’l gobiernu español nun va ordenar al gobiernu asturianu de Barbón ninguna istrución

Queremos agradecer nel congresu los diputaos a EH Bildu, que tamién se molestó por nos, faciendo una entruga parllamentaria a favor nuesu y a traviés d’ Andecha Astur, que foi la que fizo los trámites pa que fuere posible que consiguieremos llegar y por primer vegá se sintiera falar del nuesu conflictu direutamente nel Congresu de Madrí.

A títulu personal, ¿qué ta siendo lo más duro d’esti empreslle?

Esti encierru tien algo especial que lu diferencia d’otros encierros y d’otres fuelgues de fame y ye qu’equí llegamos depués de tar dos meses confinaos en casa, pasemos d’un confinamientu a un aisllamientu.

Entamamos cuatro compañeros, nun llocal del comité de 16 metros cuadraos, y colos protocolos que tien la empresa con esto del Covid tuvimos que dividir esta sala en cuatro cuadrantes de cuatro metros cuadraos y yo creo que los primeros díes fueronlos más duros; 4 persones meties nos sos 4 metros cuadraos, ensin espaciu pa movese, ye duro y diferente a too.

Tamién nosotros al tar nuna istalación portuaria comu ye EBHI, que ta en zona restrinxía, nun tienen acesu a nosotros nin familiares, nin amigos, nin periodistes, nin nada y solo nos vienen a ver los compañeros que tan trabayando, tamos aisllaos del todo.

Agora mesmo, depués de 34 dies, toi solu yo y ya tengo más espaciu, más intimidá -que tamién s’agradez- .Yo tenía claro que seguramente pasaremos de los 30 díes, porque nun pueden ceder a la primera de cambiu, sinon tol mundo fadría una protesta comu esta y conseguiría nuna semana o quince díes lo que piden. Toos sabemos que al capital, a los políticos y al PSOE gustayos muncho apretar hasta’l llímite y tamos llegando a esi llímite. Yo si cuntaba personalmente pasar de los 30 díes, incluso de los 40.

Llevo dos díes solu, anímicamente sigo fuerte, físicamente entamo ya a ver la debilidá. Hasta los 30/32 díes llévelo bien pero ayeri y güei ya entamo a sentir la debilidá y güei ye un díe clave porque ya paso del 20% de pesu corporal perdíu colo cual la mélica, por un protocolu que tienen, tien que pidir l’ingresu hospitalariu. Yo por supuestu nun voi salir d’equí, nun voi abandonar la fuelga de fame, aguantaremos fasta escosar tolos plazos llegales, fasta l’últimu segundu que seya posible pidir esa tasa, equi siguiremos.

Sobre los sofitos esternos, lléguennos. Les redes sociales valen muncho pa eso, si bien la prensa oficial nos censura dafechu, les redes sociales son nuestres, tenemos munchisimu sofitu

Y comu te digo, al tar nuna zona portuaria restrinxida direutamente lléganos pocu. Los primeros 15/20 díes teníemos concentraciones de tola plantiya equí  a la una y media, pero la empresa prohibiólo, dende’l primer momentu fizo guerra sucia y prohibió eses concentraciones. Lo que mos quedó foron les dos antorchaes del Musel, la última esti sábadu, onde si vemos direutamente esi sofitu. Nun mos podemos quexar, tenemos el sofitu de la plantiya, de la clas trabayaora asturiana y tamién la de fuera, lléguennos sofitos ya nun solo de tol estáu sinon d’Europa, incluso d’América tamién.

Al marxe de comu fine’l conflictu llaboral d’EBHI, ¿Abúltate que los trabayaores xestionen meyor o pior los sos problemes llaborales con modelos asamblearios o colos modelos de lliberaos colos que furrulen los sindicatos españoles?

Esti ye un conflictu claramente asambleariu, nun ye nin el mesmu comité quien organiza esto, salió de la plantiya, si que tenemos el respaldu del Comité, pero esta propuesta ta llevándose asambleariamente, ensin sigles de sindicatos. La nuesa intención yera esa, que nun apaecieren sigles de sindicatos y lo que vemos col pasu del tiempu ye que los grandes sindicatos tan intentando tamién tapar y esconder esti conflictu, nun tuvimos ningún sofitu oficial de dengún de los grandes sindicatos, más allá de dalguna sección sindical, nin presencia d’ellos nes movilizaciones. Ta claro que lo qu’aquello que nun controlen intenten tapecelo y desprestixalo y que muerra, siguiendo una política similar a la del Principáu d’Asturies, d’intentar censurar en tolo posible los nuesos actos, asina que munches gracies a toa esa xente de sindicatos minoritarios, a esa xente asamblearia que día a día son los que tan tirando por esto.

 

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies