La organización presentó un escritu d’observaciones y suxerencies al borraor del Códigu Éticu presentáu pola Universidá d’Uviéu, nel que pidi incluyir que les llingües nun seyan elementos de discriminación, plantegando que’l testu final s’asoleye nel BOPA de forma billingüe
El borraor del Códigu Éticu, redautáu esclusivamente n’español, recueye na so Parte II, nel artículu 5 que “Nel desendolcu de la docencia respetaránse los drechos del estudiantáu, ensin realizar discriminación dala por causa de relixón, etnia, sesu, identidá de xéneru y orientación sesual, clas social o cualisquier otra circunstancia personal o social”.
Nesi sen, la organización propunxo incluyir dientro d’esa llista que l’usu de cualesquier llingua (con especial atención a la llingua asturiana) tampoco seya motivu de discriminación dientro del espaciu académicu. La entidá tamién pide incluyir esta aclaración dientro de la Parte III del Artículu 4.
Iniciativa yá denuncio varies situaciones de discriminación llingüística, y tovía siguen llegando quexes, pol usu llibre del asturianu dientro de la institución académica, por ello ye importante qu’esti documentu recueya que l’espresase n’asturianu nun seya un motivu de discriminación nin xenere dificultaes dientro de la Universidá d’Uviéu.
Amás, dende la organización pídise que dientro del apartáu “Principiu y valores comunes” se recueya una mención propia al asturianu. La propuesta que se fae dende Iniciativa ye: “Promoveráse’l respetu y la promoción de la diversidá llingüística en toles actividaes de la Universidá, con especial atención al cuidáu pa con los usuarios de la llingua asturiana, como llingua en situación de minorización protexía polos Estatutos d’esta institución”.
P’acabar, Iniciativa pol Asturianu plantega nel documentu que’l testu final s’asoleye nel BOPA, amás de forma bilingüe (asturianu/castellán).
Redaición InfoAsturies
This work is licensed under a Creative Commons Attribution 4.0 International License.
