Los ensin llar d’Asturies medraron un 98% dende’l 2015

  • 23 Xineru, 2020

Xente ensin casa y cases ensin xente, esi ye’l resume de la situación habitacional d’un país que, al tiempu que se vacía, permite que la so población ensin techu medre añu tres añu

El caberu censu de vivienda d’Asturies recueye un total de 613.905  llugares en condiciones d’habitabilidá, de les que   cerca de 83.000 tan vacies. Uviéu ye’l conceyu con más pisos vacios, más de 18.000, siguíu de Xixón, que suma cerca de 17.000 y Avilés con más de 4.000. Estos númberos nun incluin los pisos dedicaos al turismu esporádicu nin les segundes viviendes que pasen vacies bona parte l’añu. Al mesmu tiempu, el númberu de persones que moren n’infraviviendes o na cai continúa medrando, seique ye difícil cuntar con datos esautos, non solo porque les persones que viven nestes condiciones prefieren nun facese notar, sinon porque les alministraciones nun lleven un recuentu oficial d’estes situaciones. Los datos más averaos provienen de los cientros d’atención a persones ensin llar, qu’atienden a un 98% más que va 15 años, pero naide contabiliza a toles persones que viven en cases en ruines, menos tovía si viven en pueblos.

El conceyu con datos más fiables nesi sen ye Xixón, onde entidaes non gubernamentales, comu Mar de Niebla, lleven un recuentu averáu de les persones en situaciones estremes. Nel conceyu playu cúntense alrodiu de 440 persones ensin llar -remembremos, falamos del conceyu de les 17.000 viviendes vacies- de les que se conoz 64 que viven n’infraviviendes.

Esti caberu datu nun ye fácil calcular, porque los que viven nesta triba d’aloxamientos, que nun tienen nin remotamente les condiciones mínimes pa una vida digna, procuren nun ser llocalizaos pa nun ser espulsaos de les ruines, coches, trasteros, baxos o chaboles qu’habiten; hailos incluso que paguen alquileres por estes viviendes, con tal de nun vivir ateyabana, o qu’alquilen habitaciones comparties en cases onde s’apinen hasta venti persones.

El perfil mayoritariu ye d’home de mediana edá que quedare na cai en perdiendo’l so trabayu y que, nel meyor de los casos -ensin vivienda nun ye fácil empadronase, ya ensin padrón nun s’acede a la mayoría de les ayudes- cobra el salariu social, 448 euros que faen difícil pagar un alquiler y comer. Les families con reciella tienen prioridá a la d’aceder a viviendes protexies, pero tampocu estes algamen a cumplir la demanda y tamién s’alcuentra esti perfil pente los ensin llar.

Ye un círculu viciosu del que ye abegoso salir: ensin domiciliu reconocíu nun ye fácil ser almitíu nun trabayu ya ensin ingresos fixos ye cuasi imposible conseguir un alquiler. Al tiempu, les condiciones de vida van minando la salú física y mental, complicando progresivamente la salida.

Llucía F. Marqués

 

 

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies