Representantes d’Andecha Astur acudieron al alcuentru astur-vascu que se cellebra añalmente na llocalidá vizcaina de Larrabetzu n’alcordanza a los milicianos asturianos que cayeron en combate defendiendola

Foron alrodiu de venti mil los homes y muyeres que se desplazaron a Euskal Herria nos meses d’Abril a Xunu del añu 37. Cientos d’ellos cayeríen na defensa de Bilbao, pero en concreto’l Batallón Mateotti, formáu por llangreanos, aportó a Larrabetzu, onde defendieron la llocalidá, dexando allí la vida más de 130 asturianos.

Les sos tumbes remanaron desconocies dica la confesión nel llechu de muerte d’un vecín que dió les pistes pa encontrar la fosa que los acueye, na viesca de Bolumburu. Los vecinos de Larrabetzu nun escaecen el so valor y poro, nel añu 2013, dieron a estos defensores la consideración de “Ciudadanos d’honor”.

De magar entos vascos y asturianos dediquen ca añu per estes feches un sentíu homenaxe a estos heroes, nel que percuerren les cais de la ciodá anantes de subir pel monte, a la viesca de Bolumburu, onde tien llugar la parte más importante l’homenaxe, un actu enllenu emoción nel que s’agradez a los allí enterraos la so valiente llucha pola llibertá.

Llucía F.Marqués

This work is licensed under a Creative Commons Attribution 4.0 International License.