Los espertos alerten d’una nueva “contración socioeconómica” d’Asturies. Comu sigamos contrayéndonos vamos quedar en na… y  a munchos va prestayos

Como una hidra policéfala a la que vaigan matando a cachos fueron retayándonos ensin piedá los pegoyos del país. Agricultura, pesca, ganadería, naval, industria… la minería, tres muncho amoriar y dar bocaos al aire, ye la cabera tiesta que mos cayó, dió guerra, pero cayó. La llingua caltiense dando boquiaes, defendiéndose con tol dentame, pero ya nun ye que pocos asturianos la falen, ye qu’hai pocos asturianos.

Dalgunos ya avisaron hai tiempu, #tanfundiendoAsturies, pero quiso mirase pa otru lláu, ye la crisis, ye mundial, ye pasaxero… agora, cuando otros tan en plena recuperación, Asturies sigui en cayida llibre (igual lo más llibre que mos queda) y los “espertos” entamen a alarmase, a falar de “sangria poblacional” “apocalipsis” y “contración socioeconómica”. Lo que dicíemos, tan fundiendo Asturies; porque nun ye un país probe, que surdiera de la nada, ensin recursos nin texíu económicu y cultural, falamos d’Asturies, una tierra bayurosa cola población bien formada y una cultura fuerte y arraigonada.

Nun ye un declive casual, nin confluencia de mala suerte reiterao, sinon más bien una conxunción de desaniciu estratéxicu de los pegoyos económicos con desdexamientu de les infracadarmes, rotura de les comunicaciones y una persistente llabor de baltiáu de l’autoestima asturiana, na que se ridiculizó o criminalizó toa seña d’identidá.

“les cifres entraron en barrena” dicen, y con ello quieren vendemos que nun puede aparase, que nun hai vuelta atrás. Y pa que’l guelpe seya más suave, dicen, la única opción ye l’aria metropolitana, ello ye, abandonar a la so suerte más de la metá d’Asturies y convertir un país nuna única macrociudá, contaminada, pero eso si, enllena chigres y hoteles.

This work is licensed under a Creative Commons Attribution 4.0 International License.