Acordies l’Informe de Rentes Salariales del caberu añu, nel que se recueyen les cifres oficiales d’emplegu y salariu  del 2.017, costátase una perda de cerca de 60.000 emplegos n’Asturies nos caberos diez años, la mayor cayía del Estáu

Los datos basaos na memoria de l’Axencia Tributaria: ‘Mercáu de Trabayu y pensiones nes fontes tributaries’ recueyen el pasu de 439.553 emplegaos nel añu 2.008 a namás 379.778 del 2.017, lo que representa una perda d’emplegu asalariáu n’Asturies  del 13’6% de magar l’añu anantes del entamu oficial de la crisis, el 2.008, dica’l pasáu 2.017. Nestes cifres entá nun tan incluyios los emplegos perdíos nel preslle de los caberos pozos mineros nin los venceyaos al preslle d’Alcoa, ya que l’Axencia Tributaria trabaya con datos un añu anteriores.

Estes cifres pónenmos a la tiesta de perda d’asalariaos de tol estáu, per delantre de Castiella y Galicia. La media del estáu español ye del 0’6%, ello ye, una baxada cuasique nula nel restu de territorios.

No que cinca a salarios, d’esos cerca de 380.000 asalariaos actuales, 67.687 cobren menos de mediu SMI (7.000 más que nel 2008), un de cada cuatro trabayaores asturianos cobra menos del SMI y un de cada cinco gana menos de 2.000 € al añu; pero al mesmu tiempu dividiéronse a la metá los salarios más altos, pasando de cerca de 3.000 asturianos que ganaben más de 10 SMI a  solo 1.400, asina que más que de falta d’equidá nel repartu de la riqueza pente los asturianos tamos falando direutamente de perda global de la mesma.

Entantu, el salariu mediu añal subió en 276 €, ello ye, un 1’4%, nel mesmu periodu que la inflación medró un 11’4%, lo que quier dicir que’l poder adquisitivu real de la población baxó nun 10% nestos diez años. Amás, el xorrecimientu de los trabayos a tiempu parcial y de curtia duración agrava la precariedá llaboral, de la que deriva un fuerte amenorgamientu xeneral del nivel de vida y del acesu a recursos. La precariedá vien de la man de l’incrementu de les empreses multiserviciu, los falsos autónomos y les subcontrates; les ETT’s suponen en dalgunos seutores más del 50% del personal contratáu.

Ante estos alarmantes datos, disponibles de magar el fin d’añu, entá nun se sintió dala declaración de ningún sindicatu asturianu.

Llucía F. Marqués

This work is licensed under a Creative Commons Attribution 4.0 International License.