Recoyío nel Facebook de Daniel García de la Cuesta

Asturies ye país d’agua, y a vegaes, de muncho agua. Vistu’l tiempu que tá faciendo esti añu, vo comentar dalgunos datos que vienen ente los trabayos que fizo Tirso de Avilés a mediaos del sieglu 16, amás de poner los testos nos qu’apurre muncha información y nos que puede vese vocabulariu que seguimos usando n’Asturianu

Ello ye, qu’ente los años 1573 y 1576 fue tiempu de fame porque nos meses d’abril, mayu y xunu yeren tan grandes les tormentes de vientu, ñubes, agua y granizu, qu’arroyaben los semaos y podrecíen los frutos de la tierra como pan, panizu, fabes y llino, y los árboles tampoco frutiaben. Hubo tanto xente probe y necesitada, que sangraben a los animales pa cocelo con yerbes y alimentase con ello. Hubo manaes de xente que diba a Castiella por trigo pa dar de comer a la familia y trainlo a cuestes, pero colo esfamiaos y débiles que taben, algunos quedaben pel camín tiraos al llau de los armadixos nos que traíen la carga. Hubo tantos muertos que se bendixo parte del Campu San Franciscu d’Uviéu pa poder enterralos. Afortunadamente, nos años siguientes la cosa ameyoró y la xente pudo recuperase.

Diez años más sero, nel 1586, un 21 de setiembre, nes visperes de San Mateo, l’agua volvió a tar mui presente n’Asturies, dalgo que suel pasar tovía, pero nesti añu quedó la xente apavoriada de que, anque paecía que nun lloviere tanto, hubo gran llena de los ríos y causó tantu estrozu en tolos llaos que Tirso recueye datos como qu’hubo xente que quedó entaramingada nos árboles casi tres díes ensin poder baxar, y na Pola L.lena, (equí faigo una paradina pa contar porqué ye importante caltener, recuperar y conocer l’Asturianu pa entender onde vivimos, ya que por exemplu, Lena, nun sinifica nada, ye un hidrónimu preindoeuropeu, el so nome tradicional ye L.lena, y dizse que mos fala precisamente de les llenes, les crecíes de los ríos, y nesti casu fue tremenda), na casa de Sebastián Bernaldo, la llena llevo de la so corrada dos horros, enllenos de pan y otres coses, que fueron flotando enteros ríu abaxo hasta dar col arcu la puente d’Uxu, esgonciólu y por ello, Uviéu quedo mediu desabastecía unos díes.

Pa velo, ¿Oyisti?, de película.

Amás de la pérdida humana, ¿Cuántes coses llevaríen les llenes?

Bono, ya veis les que s’armaben antes, y, nunca llovió que nun abocanara ¿Eh ho?.