Recoyío del Facebook de Xuan de la Borrina

Desplicar los paralelismos pente la hestoria de la fresa de Candamu y la llingua asturiana nun tendría de ser preciso, por evidente

Ye de perconocíu prestíu la fresa de Candamu. Esti conceyu tien unes condiciones especiales pa qu’esti frutu se de perbién nes sos tierres. Y non solo una condiciones ambientales y xeográfiques aparentes, si non que col pasu de los sieglos xeneró una variedá de freses autóctones d’estraordinaria calidá que dió prestíu a la fresa candamina. Una fresa non mui grande, d’un preciosu color coloráu pero blanca nel so interior, d’una suavidá y dolzor únicos.

Yera bona la coxuntura y dende’l conceyu, los partíos de siempres allá polos 80/90, decidieron apostar por impulsar el seutor. Candamu, tierra perbona pal cultivu la fresa, como nun aprofitalo. Asina que, inxeniosos, modernos, eruditos ellos, decidieron pol bien del seutor el repartu de plantones ente los vecinos pa una especie de industrialización del sector. ¿Plantones de la fresa autóctona que dio sonadía al conceyu? ¿Potenciar el productu local, creando riqueza dende lo propio que tan valorao ta? ¿Crear una marca de calidá con un productu propiu y d’escelencia?

Non ¡por Dios! Dende’l Conceyu repartiose plantón del fresón d’Huelva. Si. Tráxose planta de fora, más grande, más guapa a la vista, quiciabes con mayor capacidá de produción, pero estremada, otra calidá, otru tastu, otra planta, otra cosa ¿Consecuencia? Los llabradores locales que siguíen coles plantes de siempre víen les sos plantes polinizaes poles plantes esóxenes, les plantes d’Huelva, y lo que yera un productu autóctonu, que pola so calidá dio fama al conceyu, entemecióse y varió xenéticamente pol amiestu na polinización cola planta d’Huelva, camudando, dexando de ser lo que yera, sumiendo.

A dia de güei, 2018, dende’l Conceyu candamín trabáyase cola Universidá d’Uviéu ya’l Serida pa recuperar les variantes autóctones de la planta, si inda tán a tiempu, nuna llabor d’arqueoloxía botánica.

Desplicar los paralelismos ente esto y la hestoria de la llingua asturiana nun tendría de ser necesario, por obvios. Políticos paletos, inorantes, avergoñaos de la so tierra, de les sos xentes, la so hestoria, costumes. Capaces d’estrozalo tou. ¿Que fiximos los asturianos pa merecer esto? una cosa si, votalos.

This work is licensed under a Creative Commons Attribution 4.0 International License.