• Portada
  • >
  • Mundiu
  • >
  • La XE estrena la so primer Estratexa sobro plásticos

La XE estrena la so primer Estratexa sobro plásticos

  • 3 Abril, 2018

Rentabilizar el reciclaxe, fomentar l’usu de plásticos reciclaos y ameyorar los sistemes de recoyida pa torgar qu’aporten a la mar son los pegoyos del plan propuestu pola Xunión Europea

La invasión de los mares por basoria plástica llegó al estremu de poder afirmar que si non se camuda la forma de producir y consumir, en 2050 va haber más plásticos que pexes nos nuesos océanos. El plazu avérase y la Comisión Europea decidió sentar les bases pa una nueva economía caltenible del plásticu na xunión, proponiendo una estratexa europea al respeutu que constitúi un elementu importante na meyora nel cumplimientu de los Oxetivos de Desendolcu Caltenible 2030 y los del Alcuerdu de París, permitiendo una transición escontra una economía circular y baxa en carbonu.
Pa ello va ser necesario redefinir el diseñu, fabricación, usu y reciclaxe de los plásticos n’Europa de manera que pal añu 2030, tolos envases plásticos del mercáu de la UE seyan reciclables o reutilizables, que s’amenorgue’l consumu de plásticos d’usar y tirar, y que se llende l’usu a costafecha de microplásticos.
Pa facer esto posible, el primer pasu ye la meyora de los sistemes de recoyida y reciclaxe de manera que seyan más rentables, daqué que por si solo yá podría dexar una tasa de recuperación del 40% en pocu más de 20 años. Amás ye necesario implicar tantu a los consumidores como a les industries nel usu de materiales reciclaos, aumentando la so demanda.
La rentabilidá ye un aspeutu importante, una y bones la creación d’emplegu y d’oportunidaes de negociu son les que van incentivar l’usu d’estos materiales. Nesti escenariu, la Comisión estableció la Plataforma de Sofitu al Financiamientu de la Economía Circular, en collaboración col Bancu Européu d’Inversiones, coles mires d’afalar les inversiones y dar a conocer les oportunidaes de financiamientu.
La estratexa contempla igualmente distintes midíes pa facer frente a la basoria marina, una y bones el 80% de la mesma ye d’orixe plásticu, cientrándose nel amenorgamientu de los productos plásticos d’usar y tirar (los cambeos llexislativos yá fixeron menguar notablemente la cantidá de bolses de plásticu utilizaes) y na correcha recoyida de les borrafes d’orixe marítimu, que constitúin un 20 % del total de la basoria marina.
Inoramos cuando van aportar a Asturies les primeres midíes d’esta estratexa y si los sos beneficios van llegar a notase equí, una y bones la mesma XE reconoz que nel nuesu país malpenes se cumple un sesenta por cientu de la llexislación medioambiental europea.

Llucía F. Marqués

This work is licensed under a Creative Commons Attribution 4.0 International License.

Deixa unha resposta

O teu enderezo electrónico non se publicará Os campos obrigatorios están marcados con *

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies