Dende la primer noticia, en Febreru del 2017, InfoAsturies espublizó más de 1.500 artículos, algamando el meyor posicionamientu a nivel estatal y mundial pente la prensa dixital n’asturianu no que cinca a visites
Hai un añu entamaba esta aventura, un informativu diariu nel que’l nuesu país y la so xente foren los protagonistes, cuntando l’actualidá dende un puntu de vista asturianu. Teníemos, como non, munches dubies, trabayu duru per delantre, enfotu, compromisu y perpocos medios: podría dicise que les ganes yeren el nuesu capital.
Güei podemos mirar atrás y dicir arguyosos que tamos nel bon camín. Somos con diferencia el diariu dixital escritu n’asturianu con más presencia nes redes, allugaos pol númberu de visites nel puestu 534.853 a nivel mundial, cuasi mediu millón de puestos per delantre d’Asturies.com, diariu de gran trayeutoria y que cunta con xenerosos sofitos istitucionales, siguíu a más de cinco millones de puestos pol siguiente más lleíu, Asturnews. Pesi a ser los cabezaleros, somos tamién los que menos sofitos istitucionales recibimos, situación que cuntamos que se corrixa n’años venideros.
En cuanto a presencia en redes sociales, agradecemos a los más de cuatro mil siguiores de la nuesa cuenta en twitter la so fidelidá y ponémonos el retu d’algamar los 3.000 en Facebook nel prósimu mes.
Demientres esti añu falemos de música, cultura, movilización social, investigación mélica, esportes, llingua, noticies internacionales, mediu ambiente y munchos más temes, faciendo por abarcar el total de l’actualidá ensin llendanos a los avezaos guetos culturales y sociales nos que la prensa n’asturiano aveza movese. Creemos alderiques y dimos que falar, viéndose noticies de nueso retomaes por otros medios de prensa impreso. Aportemos a un ampliu abanicu de población, incluyendo llectores n’asturianu y español. Algamemos el nuesu oxetivu.
Cara al añu qu’entama tenemosvos reservaes dalgunes sospreses, nueves estayes y dalgún camudu de “look”. Tamién queremos facer más abiertu esti informativu, pa lo que vos animamos a collaborar con nos colos vuesos comentarios, notes o inclusu con dalgún artículu prestosu, que sabemos que pente les nueses files s’alcuentra xente de muncho valir y bon escribir.
Prometemos siguir dando guerra.
Redaición InfoAsturies
This work is licensed under a Creative Commons Attribution 4.0 International License.
Descobri li e gostei,Asturiano, mais uma língua inteligível para mim falante de português.
DIEZ MIL PUESTOS DE TRABAYU
Son 26.000 los puestos de trabayu que l’apueste pola cultura de so tienen xenerao na comunidá vecina de Galicia. La oficialidá del gallegu crió un texíu económicu de 3.383 empreses (n’estayes como la editorial, televisión, radio, publicidá y nueves teunoloxíes) que representen el 2,5 por ciento de la economía gallega .
Si adautamos esa cifra a Asturies, basándonos na diferencia de población ente les dos comunidaes, Asturies crearía 10.000 puestos de trabayu de calidá si se declarare la cooficialidá de les llingües asturiana y gallego-asturiana y se perfacieren polítiques culturales, económiques y comerciales afayaíces.
Asina ye que nun soi p’atalantar cómo una cabezalera del PP d’Asturies pue inorar los beneficios evidentes de les polítiques de los sos collacios de partíu en Galicia o a los más de cien espertos que pasaren en 2017 pola Xunta Xeneral del Principáu pa desplicar lo que de verdá requier la llingua asturiana: la cooficialidá.
Nun entiendo tampoco cómo, depués d’esi despreciu y escaecimientu, pue iguar una charra informal con polo menos dos radicales ultraderechistes amazcaritaos d’espertos col único porgüeyu de robá-yos a Asturies y los asturianos el so recursu cultural cimeru amás de 10.000 puestos de trabayu.
¿Pue desplicámelo, Cherines? ¿Pue desplicá-yoslo a los 18.000 mozos asturianos que tuvieron que colar d’Asturies en 2017 pa ganase’l pan? ¿Pue desplicá-yoslo a les sos families?
(O capital da cultura. Unha achega ás industrias culturais de Galicia, estudiu de tres años ellaboráu por 17 espertos económicos y culturales gallegos gracies a la Fundación Caixa Galicia y la Universidá de Santiago de Compostela.)