La recuperación del tradicional vezu de dexar en monte los animales muertos yera una de les midies solicitaes tanto por ecoloxistes como por ganaeros p’amenorgar los daños de llobos y osos
Fasta agora y dende la crisis de les vaques lloques el “Principado” obligaba a los ganaeros a informar de toles reses muertes, pa que fueren retiraes pola empresa pública Proygrasa. Falamos de más de 25.000 animales domésticos muertos qu’añalmente se retiraben, animales qu’anantes d’esta prohibición permitíen l’alimentación d’osos y llobos ensin tener qu’atacar al ganao vivo.
Agora, Desendolcu Rural autorizará, baxo control sanitariu y alministrativu, l’abandonu de reses y animales de pastoreu muertos, col envís d’alimentar a la fauna xabaz. Queden escluyíes d’esta midida les zones averaes al aeropuertu, lo qu’afeuta a los conceyos d’Avilés, Carreño, Castrillón, Corvera, Xixón, Gozón, Illas, Llanera, Muros de Nalón, Pravia y Sotu’l Barcu.
Con esta midía tratase de reparar los daños causaos tanto al pastoreu como a la fauna xabaz pola mencionada prohibición, facilitando l’alimentación d’especies necrófagues protexies (utres), llobos y osos.
Desendolcu Rural reconoz que “la retirada xeneralizada de los cadáveres de ganao del campu asturiano podría xenerar un déficit d’alimentu qu’afeutaría a les especies carroñeres d’interés comunitariu y a los ecosistemes que les alberguen”, tal como alertaren los conservacionistas, y afita unes estrictes condiciones sanitaries y alministratives pa autorizar el depósitu de cuerpos d’animales domésticos en monte.
Los ganaeros tendrán de notificar l’abandonu de los cuerpos y dar de baxa al animal y los restos nun podrán abandonase a menos de 200 metros de zones habitaes, bebezones o praos de pación. Amás, la conseyería reservase’l drechu de control ya ispeición necesaries pa garantizar qu’l’abandonu de carroña nun afeuta a la salú pública.
La dubia que queda ye saber si, tres de venti años retirando los calabres -tanto d’animales domésticos como de xabaces-de los montes, los llobos y osos que se vieron forciaos a cazar p’alimentase, garrando el vezu incluso en dalgunos casos d’acudir a cercanies de fasteres moraes pol ser humanu, van ser quién a tornar al so ser natural y alimentase de carroña. Albídrase qu’un periodu d’adautación sedrá necesariu, polo que pidimos al ser humanu un pocoñín de paciencia y calma pa esperar a que se igue l’equilibriu natural que nos mesmos rompimos.
Llucía F. Marqués
This work is licensed under a Creative Commons Attribution 4.0 International License.
