Carta d’un ñetu al so güelu, Pelayo Norniella, asesináu pola represión franquista. Un nome más pente los milentas d’asturianos que tamos obligaos a remembrar. Porque si los escaecemos, tamos tornando a matalos.

 Queríu güelu:

Como te prometí, continuo na llucha pa consiguir verdá, xusticia y arreglu pa toles víctimes del franquismu. Nun ye fácil: quieren siguivos condergando al silenciu, al ostracismu, a lo puramente personal y familiar. Quieren que s’escaeza les razones de la vuesa llucha. Quieren que sigas siendo’l “innomable”, como bien dicía nel mio prólogu del llibru so la represión franquista en  Parres y Cangues d’Onís.

Hai una campaña por que s’abran les fueses qu’abonden por toles cunetes y ribayos, güelu. ¡Que vergoña: somos l’únicu país européu que sigue teniendo fueses comunes nel olvidu!. El problema, güelu, ye que pretenden que lo faigan entidaes privaes, asociaciones, quien  lo realicen y quieren que se faiga ensin que l’estáu asuma la so responsabilidá.

Los crímenes del franquismu, al contrariu que los d’otros países de la nuesa redolada, nunca s’investigaron. Nun principiu nun se fixo por motivos obvios, pero cola transición y la llei d’amnistía volvió perdese una nueva oportunidá de xulgar a los verdugos y reparar a les víctimes. Pero ¿por qué nun se fai güei?

Güelu, yo siempres tuvi claro que prefiero que los tos restos fuelguen nel mesmu llugar nel que fuisti asesináu. Ellí, en Sobrepiedra. En concencia, taría bien a favor de qu’un Xuez viniera y desaterrara los vuesos cuerpos, fixéra-yos  les prebes forenses pertinentes -incluyíu l’ADN-, investigárase y condergara, si vivieren, a los asesinos y los sos inductores, y dempués, yá identificaos los cuerpos, soterrárasevos nel mesmu llugar, nunes condiciones dignes. Eso paezme abondo meyor que llevase los güesos a un nichu familiar y escondelos ellí pa siempres. Les vueses tumbes tienen de ser un berru, una denuncia, l’alcordanza de lo qu’enxamás tenemos de dexar que vuelva asoceder.

Ye bien llexítimo qu’otres families quieran recuperar los restos de los sos deudos y soterralos xunto’l restu  la so familia, nun pretende impone-y a naide la mio forma d’entender la memoria, sicasí esto, güelu, xenera dellos problemes:

– En primer llugar: “Escavar ye destruyir”, si tratar d’una fuesa común y como sociedá queremos denunciar los crímenes cometíos pol franquismu, al escavala tamos acabando cola posibilidá de denunciar los crímenes ellí soterraos.

La llexislación forense a valir, güelu, dispón que cuando apaeza un cadabre naide tien de tocalo hasta que llegue un forense xudicial. Daqué que nun suel faese nes escavaciones de les fueses de la represión franquista, que nel meyor de los casos, van  ser escavaes como si d’una tumba medieval se trataren. Pero los delitos escontra la humanidá, güelu, nun prescriben y los asesinatos ende cometíos nunca s’investigaron, polo tanto nun procede desenterrar los restos como un xacimientu arqueolóxicu, sinón como una fuesa onde se cometió un delitu de lesa humanidá.

– Una vegada que los restos fueren desenterraos illegalmente, yá nun hai vuelta tras.  La fuesa yá foi destruyida pa siempres. El día de mañana van poder dicir que’l franquismu nunca ordenó soterrar persones nes cunetes, porque diches fueses yá nun van esistir. Esta posibilidá probatoria esaníciase cuando lo que se realiza ye un desenterramientu illegal. ¿Vas entendiendo per ónde van los tiros?

– Cuando falamos de fueses, güelu, tamos falando de crímenes, en concretu de los más graves crímenes qu’un estáu puede cometer en cualquier sociedá o país, esto ye, de crímenes de guerra, contra la paz y de lesa humanidá. La esumación ya identificación de víctimes, siguiendo lo dispuesto pol Autu del Tribunal Supremu de 28 de marzu de 2012, correspuende a los Xulgaos d’instrucción de los llugares onde asocedieron presuntamente los fechos.

Paez entós nidio, güelu, que les esumaciones tienen de realizase siguiendo procedimientos acordes col drechu internacional, esto ye, nel marcu d’un procedimientu xudicial válidu, con toles garantíes. L’alministración llocal, central o autonómica, les asociaciones, etc van poder ausiliar a l’alministración xudicial, pero enxamás suplantala (nun estáu de drechu).

Ye llexítimo, güelu, que les families de les víctimes queramos conocer los fechos, saber qué asocedió colos nuesos ya intentar desaniciar el dañu causáu por tener los sos restos soterraos nun llugar desconocíu pola familia, pasándose más de 70 años ensin un llugar al que dir cuando queremos recordar al nuesu familiar. Tamién ye llexítimo que les families podamos conocer les circunstancies qu’arrodiaron los últimos años de vida del nuesu familiar y les circunstancies de la so muerte. Poro, sedría llóxico desixir nun estáu de drechu que ponga al serviciu de los familiares los medios necesarios pa poder aportar a esa información

Cuando se fai una esumación por entidaes privaes ta acabándose cola posibilidá d’investigar los crímenes contra la humanidá y el franquismu va tar ganando una nueva batalla. Non yá asesinó al familiar que los sos restos buscamos, sinón que al desenterralu al marxe de la xusticia, el nacional-catolicismu, güelu, vuelve ganar  sobre la memoria del difuntu, que’l so crime va quedar per siempres impune.

Entós, ¿por qué les víctimes del franquismu habéis de tener un tratamientu, distintu a cualesquier otra persona? ¿Por qué se vos niega’l vuesu drechu a que los crímenes de los que sois víctimes seyan investigaos xudicialmente, y nel so casu, les sos victimarios seyan enxuiciaos y condergaos polos crímenes cometíos?.

Les esumaciones de fueses del franquismu, güelu, fueron llargamente espublizaes pelos medios y cuntaron amás cola mayor parte del financiamientu que, dende Moncloa, distribuyeron pa estos fines “memorialísticos”. D’esta forma los desenterramientos illegales convirtiéronse na exa central que dexó’l tapecimientu de la cuestión de fondu, esto ye, la reconocencia xurídica de les víctimes. Cuando l’actual sistema que nos gobierna, impulsa les esumaciones privaes, el so únicu oxetivu ye siguir calteniendo l’actual sistema d’impunidá, negando para siempres el drechu de les víctimes a la verdá, a la xusticia y al arreglu.

P’acabar cola impunidá namá hai una vía: una llei emanada del Parlamentu español, que condergue xurídicamente illegal el réxime franquista, les sos lleis represives y los sos tribunales, y que declare nules de plenu derechu les sos sentencies.

Lo demás, güelu, ye siguir nel so enfotu de caltenevos na vuesa condición de “innomables”. Quieren negavos los principios de “verdá, xusticia y arreglu”. Prefieren que se vos escuenda, avergoñaos, como yá se faía mientres el franquismu, onde’l silenciu y la vergoña yeren la única posibilidá de supervivencia: faer gala de familiar d’una víctima podía pagase bien caro ya’l silenciu yera una forma de protexer a los neños d’aquellos tiempos de más represalies.

Se qu’hai muncha xente, güelu, que reivindica de bona fe les esumaciones de les fueses, ensin ser conscientes de lo qu’ello significa. Pero tamién se que munchos otros lo faen dende l’interés en cerrar un capítulu cafio” pa la biografía familiar y pal “pedigree” de demócrata qu’agora tantos s’arroguen Tan fino, güelu, qu’una sele brisa faelo sumir.

Nun quiero pensar -o prefiero nun pensalo- que dalgunos puedan faelo pol meru interés crematísticu, por más que la caza de subvenciones seya unu de los deportes en boga nesta nueva España que s’alzó sobre l’escaezu de los vuesos güesos y la vuesa  memoria . Espero nun equivócame.

Voi siguir reivindicando qu’algames verdá, xusticia y arreglu. Voi Siguir velando porque se conoza que fuisti asesináu polos tos ideales y que unos fascistes llevantaron contra’l Réxime Democráticu Republicanu que tu defendíes y por unos valores de solidaridá pa tola humanidá y de xusticia social. Que dichos golpistes, los matones de los privilexaos, dispunxéronse non yá a acabar col réxime, sinón que quixeron acabar colos ideales, asesinando a toos aquellos que los defendíen.

Llamentablemente, güelu, lo que creíemos  la llegada d’una nueva democracia pal nuesu país, namás foi un engañu pa perpetuar nel poder a quien socatraron a los vuesos asesinos. Por eso siguen condergándovos a la “innombrabilidad”. Nun lo voi dexar, güelu. Nun voi agambar na llucha. Pa ello, tendríen que meteme almin tamién n’otra fuesa común.

Voi faer que fasta’l vientu xuxurie’l to nome a los tos asesinos. Quiciabes non a los executores, que yá tán muertos, pero si a los sos istigadores. Xúrolo. Una vegada más.

Ruben Norniella, Les Arriondes 7 de marzu de 2017

This work is licensed under a Creative Commons Attribution 4.0 International License.