• Portada
  • >
  • Opinión
  • >
  • Les Panteres Negres: una esperiencia de contra-poder popular

Les Panteres Negres: una esperiencia de contra-poder popular

  • 8 Marzu, 2017

Javier Cubero

El Black Panther Party (BPP)  posiblemente seya ún de los grupos de la nueva esquierda de los años 1960 que más proyección mediática garró convirtiéndose nun símbolu col que revolucionarios de tol mundu se víen identificaos. Por embargu al igual qu’asocede con tantes otres temátiques l’árbol nun dexa ver la viesca y acullá de la fascinación dende una perspeutiva contra-cultural pol Black Power, como un iconu tresgresor cola abierta ostentación de la posesión d’armes nel mesmu patiu domésticu del Imperiu norteamericanu, munches vegaes nun remaneció la necesaria reflexón alredor de les panteres negres, de la rotura del monopoliu de l’autoridá social nel espaciu públicu que provocaron na sociedá norteamericana, de la so práutica socio-política realizando llabores tanto de vanguardia como de retaguardia, o de la perinteresante evolución doctrinal y estratéxica del so proyeutu nacionalista y anticapitalista.

Asina n’abierta antítesis colos presupuestos esenciales del materialismu hestóricu una vuelta más la estetificación ideolóxica como falsa conciencia de la realidá y el folclorismu como vía d’autoafirmación vienen a ocupar l’espaciu que tendría de corresponder al alderique estratéxicu y a l’activación de dinámiques d’aición coleutiva con progresión nel tiempu.

Una primer considerancia qu’hai que realizar dende’l nuesu particular “equí y agora” ye que’l BPP nun foi nin el raigañu nin la vanguardia fundadora de nengún movimientu social sinón la espresión política más ellaborada y más avanzada d’un determináu estáu de les coses que se caracterizaba por una población xuvenil negra económicamente cada vez más afogada al empar que reprimida policialmente nos barrios probes d’Estaos Xuníos, y que por mor d’eses circunstancies anició un procesu de radicalización espontánea con diversos motines y españíos de violencia caleyera (namás nel añu 1967 contabilizáronse unes 123 revueltes). Daqué interesante sobre lo que pensar nunos tiempos nos que dacuando paecemos empeñaos en construyir la casa pel teyáu.

Na xenealoxía específica de la llucha afroamericana’l BPP vien significar la superación de la bipolarización establecida ente’l mesianismu etnocéntricu de la Nación del Islam, roturista en términos nacionales pero mui conservador n’otros aspeutos, y un movimientu polos derechos civiles qu’al traviés d’organizaciones como l’Asociación Nacional pal Progresu de la Xente de Color (NAACP) sobredimensionaba l’ámbitu xurídicu mientres ignoraba les causes estructurales de la opresión racista asina como la naturaleza del marco socio-políticu que permitía la so reproducción na vida cotidiana. La Nación del Islam venía a ser el reflexu invertíu de la derecha racista WASP cola so concepción de la identidá nacional norteamericana como blanca, anglosaxona y protestante. Asina frente a una realidá social y un discursu identitariu de los que se víen esplícitamente marxinaos los militantes de la Nación del Islam plantegaben un proyeutu identitariu basáu nuna peculiar reellaboración del credu islámicu y nel racismu anti-blancu. Pero la Nación del Islam en cuantes que taba fundamentalmente centrada na superación del auto-odiu y na recuperación del arguyu pola negritú africana derivó nun movimientu de calter más cultural que políticu proyeutando la dignificación del “guetu” nunos términos aislacionistes del conxuntu global de les rellaciones sociales, esto ye, un hipotéticu final de la contradicción principal (la opresión racista nesti contestu) ensin plantegar el resolvimientu de la cuestión tresversal de la contradicción determinante (la esplotación capitalista). La NAACP pela so parte taba somorguiada nuna estratexa llegalista que, asumiendo gran parte de los falacies del pensamientu dominante na so versión más “progresista”, arrenunciaba a cualisquier clase de cambéu social acullá de la eliminación de les barreres institucionales que torgaben la promoción social de los negros más acomodaos de tal manera qu’en nengún momentu plantegó’l fin de l’abolición de la opresión racista nel “guetu” sinón namás la posibilidá d’escapar individualmente d’él. Colo qu’al postular la realización d’una “igualdá d’oportunidaes” nel marcu d’una sociedá estructuralmente capitalista y racista la NAACP pretendía superar un problema de naturaleza socio-política y coleutiva con falses soluciones individuales de calter xurídico-técnicu. Frente a estos dos sectores el BPP refugó tanto l’aislacionismu étnicu como la integración individualizada al respective de les rellaciones sociales dominantes.

El BPP foi fundáu n’ochobre de 1966 y la so primer actividá foi la creación de patrulles de control policial, que diben dotaes d’armes pesaes, cámares, grabadores y llibros de lleis. Les panteres negres cuando s’alcontraben con un control policial anunciaben que la llexislación permitía a los ciudadanos ser testigos de controles y arrestos policiales. Igualmente tamién esplicaben a los deteníos cualos yeren los sos derechos. D’esta manera los militantes al tratar a los policíes d’igual a igual causaben un gran impautu devolviendo a munchos l’arguyu de ser negros y xenerando al empar una rede de solidaridaes. Asina’l BPP foi ganándose’l respetu y l’enfotu d’una población decepcionada con otros modelos de llideralgu comunitariu. Pero’l saltu cualitativu consiguiose dar en mayu de 1967 cuando un grupu de panteres negres entró armáu nuna sesión del parllamentu estatal de California, entós foi xeneráu tal escándalu qu’algamaron una repercusión mediática nel conxuntu de los Estaos Xuníos multiplicándose les afiliaciones. El partíu taba exerciendo con ésitu una gran atracción ente una mocedá negra que sufría diariamente los atropellos y les arbitrariedaes d’unos policíes descaradamente racistes. De fechu en 1969 yá esistíen unes 40 delegaciones y la militancia ascendía a dellos millares.

Nos años vinientes el BPP, que ñaciera como una organización d’autodefensa, se foi desendolcando non únicamente como una fuercia d’oposición al Gobiernu dende fora del marcu institucional sinón principalmente como una alternativa al propiu sistema social y políticu en representación d’otru proyeutu nacional, el de la etnia afroamericana constituyida en poder políticu al traviés de l’aición coleutiva. De fechu la estructura organizativa del partíu yera la d’una especie d’Estáu embrionariu, colos sos ministerios, la so militancia uniformada y el so voceru, el periódicu The Black Panther que diariamente treslladaba a militantes y simpatizantes una visión crítica sobre lo qu’asocedía nos sos barrios y nel mundu. Y xunto coles Patrulles d’Alerta Policial se foron creando otros programes de trabayu comunitariu como’l d’Almuerzu Gratuitu pa los Neños en collaboración coles ilesies negres. En 1971 yá esistía una amplia bayura de programes que xeneraben estremaos venceyos de complicidá y sofitu ente’l partíu y la población negra: Serviciu Intercomunal de Noticies, Campaña de Recoyida de Firmes pal Control Comunitariu de la Policía, Escueles de Lliberación, Clínica Sanitaria y d’Investigación Mélica Gratuita, Programa Ropa Gratuita, Tresporte Gratuitu pa les Cárceles, Vieyos contra un Entornu Inseguru, Fundación pa la Investigación de la Drepanocitosis, Programa de Cooperatives de Vivienda Gratuita…

El testu fundamental de les panteres negres, el llamáu “Programa de los Diez Puntos”, nun yera un documentu nin de calter revolucionariu nin reformista en sigo mesmu, sinón que recoyendo unes reivindicaciones sociales y democrátiques mui básiques dexaba una gran flexibilidá nel so desendolcu y aplicación constituyendo polo tanto una plataforma dende la que trabayar con amplios sectores de la población. La so finalidá nun yera tanto’l dar rempuestes como’l xenerar entrugues.

Anque’l partíu definíase como marxista, y esixíase que tolos militantes tuvieren y estudiaren el Llibru Roxu de Mao, namás dalgunos pocos cuadros direutivos realmente lleeron los testos clásicos del materialismu hestóricu. En cambiu yeren mui pocos los panteres negres que nun conocieren los discursos de Malcolm X, que nos sos caberos años de vida, dempués de romper cola Nación del Islam, reformuló los sos plantegamientos políticos. La crítica de Malcolm X al movimientu de los derechos civiles, por exemplu, foi nidiamente aceptada pol BPP qu’enxamás consideró sofitar o complementar a organizaciones como la NAACP sinón el desplazales y sustituyiles. Otros dos aspeutos esenciales del pensamientu de Malcolm X que tamién recoyeron foron nel nivel metodolóxicu, l’autoorganización política de los negros de manera independiente al respective de la esquierda “blanca”, y nel estratéxicu, la reivindicación de l’autodetermín y d’un estáu negru. Un pensador que tuvo especial influencia ente los fundadores del partíu foi Frantz Fanon, que na so obra analizaba’l papel estructural de la violencia tanto na perpetuación del réxime colonial como na emancipación popular ya inclusive na mesma recuperación de la dignidá humana.

El BPP, nos sos curtios pero axitaos años d’esistencia, foi marcando distancies con un nacionalismu centráu nel panafricanismu cultural y abriéndose a la xunida d’aición con otros grupos étnicos, incluyíos los blancos, al traviés d’iniciatives como’l Frente Nacional contra’l Fascismu. Asina esti partíu pasó a apostar pol “intercomunalismu” como proyeutu de rellación equitativa ente les distintes comunidaes étniques d’Estaos Xuníos. Esta dinámica tuvo como principal espresión la Convención Constituyente Revolucionaria del Pueblu (RPCC) del 4 setiembre de 1970, na que participaron seis mil persones procedentes de diverses organizaciones de la esquierda radical y de los nuevos movimientos sociales. Pero esta asamblea que supuestamente tenía que marcar un enantes y un dempués na llucha y coordinación de tolos sectores oprimíos de la sociedá norteamericana foi intensamente caótica nun llegando a construyise nengún proyeutu xunitariu d’emancipación coleutiva.

Les panteres negres  se veíen a sigo mesmos como un allongamientu de los movimientos de lliberación del Tercer Mundu y progresivamente ficieron del internacionalismu revolucionariu una de los sos más destacaes señes d’identidá realizando por exemplu una campaña especialmente dura contra la guerra de Vietnam. Tamién tuvieron contautos con gobiernos antiimperialistes, ya inclusive cola protección del estáu arxelín se crea una embaxada n’Arxel.

La realidá ye qu’esta organización acumuló tanta fuercia social qu’en 1969 el direutor del FBI, Edgar Hoover, la definía como “la mayor amenaza a la seguridá interior del país”. De fechu tol aparatu represivu del sistema foi utilizáu contra’l BPP: les sos sedes sufrieron tiroteos y asaltos policiales, les sos estructures organizatives foron dinamitaes dende dientru por infiltraos, y los sos militantes pagaron el so compromisu políticu con acosos policiales, montaxes xudiciales, criminalización mediática, y en dellos casos hasta col so asesinatu.

Precisamente como consecuencia de la combinación de la presión del FBI y de les lluches personalistes pol control de la direición política acabaría produciéndose, en 1971, la fragmentación del BPP alredor de los llideralgos de Newton y Cleaver. Énte la evidencia d’una represión cada vuelta más brutal Cleaver dende’l esiliu, n’Arxel, consideraba que la única rempuesta posible pasaba pola llucha armada mientres que Newton optaba pola participación eleutoral col oxetivu d’entrar nes instituciones. La crisis acabaría resolviéndose metanes intrigues y espulsiones cola dixebra del partíu, desencadenándose un procesu de descomposición que s’aceleró cuando en 1972 el Comité Central ordenó a tolos panteres negres zarrar los llocales y abandonar los programes de supervivencia comunitaria pa concentrar toles fuercies posibles nuna campaña a l’alcaldía d’Oakland. Munchos abandonaron entós la organización y otros lo ficieron dempués del fracasu eleutoral.

Concluyendo yá podemos señalar que l’ésitu del BPP como fenómenu de mases se debió en bona parte a la converxencia d’unes condiciones sociales abiertamente esplosives, la creación d’una imaxe mediática mui atractiva, el desendolcu d’una dinámica de trabayu especialmente intensa, y la realización d’una estratexa centrada na autoorganización de los oprimíos dende abaxu y por ellos mesmos. Y frente al enclín actual a confundir lo que ye un movimientu y lo que ye una organización, ye mui interesante observar de que manera’l BPP, evitando vanguardismos autorefenciales, precisamente centraba’l so llabor na rexeneración societaria de la comunidá negra.

This work is licensed under a Creative Commons Attribution 4.0 International License.

Dexa una rempuesta

La so direición de corréu lleutrónicu nun sedrá espublizada. Los campos precisos tan marcaos *

Este sitio emprega Akismet para reducir o spam. Aprende como se procesan os datos dos teus comentarios.

Este sitio web utiliza cookies para que usted tenga la mejor experiencia de usuario. Si continúa navegando está dando su consentimiento para la aceptación de las mencionadas cookies y la aceptación de nuestra política de cookies. ACEPTAR

Aviso de cookies