Un añu más les muyeres salieron a la cai a cellebrar la so comuña nuna folixa que funde los sos raigaños bien fondo na nuesa tradición -seique non siempres foi de la man col antroxu-
Asturianes de toles edaes, ensin paisanos nin neños, xúntense’l xueves anantes d’antroxu a xintar, falar y rir. Seique nun entamu yera vezu que s’axuntaren les muyeres de la mesma familia, especialmente les más y madrines (comadres), anguañu xúntense grupos de muyeres qu’acomuñen por estremaos motivos: presonales, llaborales, d’estudios… básicamente, que compartan les ganes de compartir un díe de charra y folixa.
En Xixón, de magar 1986, la Conxusta Feminista Les Comadres plantegó añadir un calter reivindicativu a esta folixa, a traviés de los premios Comadre d’Oru y Felpeyu colos que dan reconocencia a los que peleen pola igualdá y dignidá de la muyer, col premiu de la Comadre d’Oru, ya amuesen el so despreciu pa tolos que ponen torgues a la mesma.
Esti añu, el premiu foi pa Mar Esquembre Cerdá , Cofundadora de la Rede Feminista de Drechu Constitucional, con un accésit especial a la escritora Carmen Gómez Ojea. L’antipremiu Felpeyu, que tuvo enforma reñíu, algamólu David Pérez, Alcalde d’Alcorcón, poles sos declaraciones llamando amargaes y fracasaes a les feministes, col accésit Babayu pa Felix de Azua, escritor y académicu de la RAE, tamién poles sos declaraciones machistes.
This work is licensed under a Creative Commons Attribution 4.0 International License.
