Una pancarta na fachada del palaciu de Camposagrado, sede de la Escuela Superior d’Arte, llevó’l mensaxe antifacista hasta’l mesmu fondu del mitin de Vox. Abascal nun pudo obvialo y acabó refiriéndose al cartelu durante la so intervención.
Abascal tenía l’escenariu, la megafonía y les banderes. Pero enriba esperaba un mensaxe que nun figuraba nel guión de Vox: «No pasarán». La pancarta colgada na fachada del palaciu de Camposagrado convirtió’l mitin del dirixente ultradrechista español n’Avilés nuna escena cargada d’ironía, col lema antifacista a la vista detrás del propiu orador.
L’edificiu alluga la sede de los estudios de Diseñu de la Escuela Superior d’Arte del Principáu d’Asturies. La ubicación del cartelu dio-y una fuerza especial a la protesta: el mensaxe taba nel inmueble qu’enmarcaba l’actu políticu, sobre’l mesmu espaciu escoyíu pa la intervención d’Abascal.
La troleada dexó una composición visual difícil de meyorar. Abaxo, el líder de Vox dirixíase a los sos siguidores; enriba, tres pallabres resumíen el refugu antifacista. La fachada dexó de ser un simple decoráu pa introducir una respuesta política nel propiu paisaxe del mitin.
El cartelu nun pasó desapercibíu pal destinatariu. Abascal refirióse espresamente a la pancarta durante’l so discursu, reconociendo tamién l’abondosa concentración convocada contra la so presencia.
L’aición coincidió cola movilización convocada por Asturies Antifacista nel Parche, baxo’l lema «Paremos los pies al facismu». La tarde del miércoles 21 d’ochobre tuvo marcada poles protestes contra’l presidente de Vox y pol importante despliegue policial que cortó’l pasu a manifestantes que trataben d’averase al actu per distintes cais.
La pancarta abrió otra vía pa facer visible’l refugu; una que nun podía torgase a golpe de porra.
This work is licensed under a Creative Commons Attribution 4.0 International License.
