Música, poesía y una representación simbólica percorrieron ayeri, 7 de setiembre, décades de desposesión, desplazamientos y matances contra’l pueblu palestín, hasta llegar a la destrucción actual de Gaza
El Náutico de Xixón convirtióse ayeri nun espaciu de memoria, denuncia y solidaridá col pueblu palestín. Ante un públicu numberosu, música, poesía y una representación simbólica sirvieron pa percorrer una historia de violencia que nun empieza’l 7 d’ochobre de 2023 y que la organización quixo presentar como un procesu continuáu de colonización, espulsión y destrucción.
L’actu encadarmóse en cuatro grandes bloques: el periodu del Mandatu británicu y el desarrollu de les organizaciones sionistes armaes; la creación del Estáu d’Israel y la Nakba palestina; les sucesives operaciones militares sobre Gaza y los territorios ocupaos; y, finalmente, la fase abierta n’ochobre de 2023, marcada pola destrucción masiva de Gaza.
La iniciativa quiso romper precisamente cola idega de que’l conflictu palestín-israelín naz col ataque de Hamás del 7 d’ochobre. La representación recordó episodios de violencia anteriores a 1948 y les matances, espulsiones y desplazamientos que siguieron a la creación d’Israel y que provocaron que cientos de miles de palestinos perdieren les sos cases y tierres.
Dende entós, la ocupación, la colonización y los conflictos armaos marcaron la vida de xeneraciones enteres. El percorríu recordó episodios como Sabra y Chatila, les operaciones militares sobre Gaza, la Operación Plomu Fundíu de 2008-2009, los ataques de 2012 y 2014 o la represión de les movilizaciones palestines posteriores.
Pero’l centru emocional de l’actu foi inevitablemente Gaza.
La Comisión Internacional Independiente d’Investigación de les Naciones Xuníes sobre los Territorios Palestinos Ocupaos concluyó en setiembre de 2025 que les autoridaes y fuercies de seguridá israelíes cometieren cuatro de los cinco actos contemplaos pola Convención contra’l Xenocidiu y que lo fixeren cola intención específica de destruyir, total o parcialmente, al grupu palestín en Gaza.
La destrucción de Gaza dexó decenes de miles de muertos, una parte enorme d’ellos población civil, amás de desplazamientos masivos, fame, destrucción d’hospitales, centros educativos, viviendes, infraestructures de saneamientu y espacios culturales y relixosos. En xunu d’esti mesmu añu, la presidencia de la Comisión d’Investigación de la ONU describía lo que vive Gaza como l’ataque más devastador contra’l pueblu palestín dende 1948.
L’actu del Náutico recordó especialmente a los neños y neñes. Una memoria que n’Asturies yá tuvo otres espresiones colectives, como la iniciativa de Sobrescobiu pa poner nome a la reciella palestina asesinada, dientro d’una campaña que llevó a distintos puntos del país la llectura pública de miles de nomes de menores muertos en Gaza.
La representación nun quedó namás nel recuerdu de les víctimes. Tamién señaló responsabilidaes polítiques y reclamó que los responsables de crímenes internacionales nun puedan actuar con impunidá.
El Tribunal Penal Internacional emitió’l 21 de payares de 2024 una orde de detención contra Benjamin Netanyahu y l’entós ministru de Defensa Yoav Gallant, al considerar qu’existen motivos razonables pa atribuyi-yos crímenes de guerra y crímenes contra la humanidá, ente ellos l’usu de la fame como métodu de guerra.
La denuncia señaló igualmente’l papel de la estrema derecha israelina y de dirixentes como Itamar Ben-Gvir, ministru de Seguridá Nacional y pieza fundamental de la mayoría política que sofita a Netanyahu. Ben-Gvir volvió plantegar esta mesma selmana un plan pa favorecer la emigración masiva de población palestina fuera de Gaza.
Pero la crítica espresada en Xixón tresciende les fronteres israelianes. Una de les demandes constantes del movimientu solidariu ye que los gobiernos europeos dexen de caltener relaciones económiques, militares o institucionales que contribuyan a sostener la situación.
N’Asturies, esi alderique tuvo una espresión bien concreta cola denuncia de la posible contratación nel Puertu d’El Musel d’una empresa venceyada a la industria militar israelina. La Plataforma Solidaria Asturies con Palestina reclamó entós que dineru y recursos públicos asturianos nun acabaren beneficiando a empreses integraes nel complexu militar israelín.
La solidaridá palestina tien amás una presencia constante nes cais asturianes. Xixón vivió movilizaciones multitudinaries y concentraciones de sofitu a les flotines que trataron de llevar ayuda humanitaria a Gaza. La ciudá reclamó la llibertá de les persones participantes na Flotina y el final del collaboracionismu col sionismu tres les operaciones israelíes contra les embarcaciones.
Esa presión ciudadana llegó tamién a la cultura y al consumu. En Xixón, el boicó al Tsunami polos venceyos empresariales de KKR con intereses israelinos provocó un alderique sobre hasta qué puntu les decisiones económiques aparentemente alloñaes de la guerra pueden contribuir a financiar o normalizar estructures venceyaes a la ocupación.
Lo del Náutico foi, nesi sen, daqué más qu’una representación. Foi una llamada a caltener viva la memoria cuando les cifres amenacen con convertir miles de víctimes en simples númberos.
Porque detrás de cada cifra hai una persona, una familia, una casa, una historia.
Y porque, como recordó l’actu de Xixón, Palestina nun empezó’l 7 d’ochobre y la solidaridá tampoco puede terminar cuando dexe d’ocupar les portaes.
This work is licensed under a Creative Commons Attribution 4.0 International License.
