El Conseyu de Gobiernu autorizó un gastu de 879.254,66 euros pa rehabilitar el refuxu de Brañagallones, nel conceyu Casu. Les obres, encargaes a Tragsa, tán previstes ente’l 15 de setiembre de 2026 y el 14 de mayu de 2027.

La intervención pretende resolver problemes d’humidá, condensación y filtraciones, amás de meyorar la eficiencia enerxética y l’accesibilidá del edificiu. El refuxu ta allugáu nun espaciu d’altu valor ambiental, polo que la obra tendrá que compatibilizar la conservación del inmueble col respetu al entornu.

Un equipamientu públicu nun espaciu sensible

La inversión pue optar a financiación del Fondu de Transición Xusta. La rehabilitación d’un equipamientu nel Parque Natural de Redes tien interés turísticu y territorial, pero esixe control públicu sobre los plazos, los materiales y l’impactu de los trabayos.

L¡actuación llega nun momentu nel que les fasteres rurales d’Asturies reclamen servicios, actividá económica y polítiques que nun reduzan’l territoriu a un decoráu. La defensa del mediu natural tien que ser compatible cola vida nos pueblos y cola xestión responsable de les infraestructures públiques.

El calendariu anunciáu ye d’ocho meses. La información oficial tendrá que concretar cómo va funcionar el refuxu mientres la obra, qué midíes ambientales van aplicase y cuál va ser el coste final una vegada rematada.

This work is licensed under a Creative Commons Attribution 4.0 International License.