Nun hai una estadística que demuestre que los ocho rapacinos de La Florida seyan más peligrosos qu’un grupu de ocho turistes escoyíos al azar o qu’ocho persones ucraínes. Lo que sí hai ye una diferencia evidente na presunción que facemos sobre unos y sobre otros: al turista presuponémos-y capacidad de consumu; al ucraín, condición de víctima; al menor migrante probe, peligrosidá. Y esa diferencia nun la ponen les estadístiques: ponla la mirada social
N’Asturies hai, según los últimos datos oficiales disponibles, 3.005 persones baxo protección temporal pola guerra d’Ucraína. El númberu total de persones de nacionalidá ucraína con documentación de residencia en vigor llega a 3.691. Nun falamos d’un grupu testimonial, sinón de miles de persones que, dende l’entamu de la guerra, pasaron a formar parte de la realidá demográfica asturiana.
Al mesmu tiempu, hai conceyos asturianos que cada branu reciben una cantidá de población foriata inmensamente superior a la propia. Llanes pasa d’alredor de 14.000 habitantes a unos 70.000 en temporada alta: unes 56.000 persones más. Ribeseya, con unos 5.500 habitantes, llega a unos 28.000 nel branu. Ello xenera dificultaes nos servicios públicos y na convivencia. Ocupen viviendes, aparquen coches, xeneren residuos, utilicen agua, carreteres, sanidá y servicios públicos. Tamién gasten perres, enllenen terraces, hoteles y comercios. Y, precisamente por eso, la so presencia ye considerada polo sistema económicu non como una carga, sinón como una oportunidá.
Al turista, inclusive cuando se critica’l modelu turísticu, nun se-y atribúi de man una peligrosidá personal por ser foriatu. El problema ye lo que provoca un modelu de masificación, non que’l visitante seya sospechosu por definición.
Y entós llegamos a La Florida, n’Uviéu.
Nun falamos de 300.000 persones. Nin de 300. Nin siquiera de 30, como llegó a circular nun primer momentu. Falamos de ocho rapacinos, quince si llegare a enllenase al so máximu.
N’Asturies hai en total 147 menores non acompañaos tutelaos. Nun hai base estadística que permita afirmar que los menores non acompañaos seyan más peligrosos que los demás foriatos que viven o pasen per Asturies. Nun sabemos estadísticamente que los turistas seyan menos peligrosos que los menores non acompañaos. Nun sabemos que los refuxaos ucraínos lo seyan. Lo que pasa ye que a esos dos colectivos nun se-yos esixe demostrar colectivamente que nun son peligrosos anantes d’aceptar la so presencia.
¿Por qué estos 147 foriatos estorben y los decenes de miles que lleguen pol turismu non? obvio. Porque dexen perres.
Espera, ¿y los ucranianos? (y polacos, rumanos u cualquier otru veníu del este europeu). Ehi hai qu’enfrentar una realidá más incomoda, esos nun estorben porque son caucásicos, blanquinos, roxos, asemeyaos a nos.
Cuando se presupón un peligru ensin conocer a les persones concretes, basándomos esclusivamente na so raza y nacionalidá tamos entrando nel terrén del racismu, ensin más.
Pero curiau, que’l turista d’orixe africanu tampocu estorba si trae la cartera enllena; ye equí onde aparez la segunda discriminación, ensin la que la primera nun esiste, y la pallabra aporofobia.
El términu, acuñáu pola filósofa Adela Cortina, define’l mieu, refugu o aversión hacia les persones probes o desfavorecíes. La idea ye especialmente útil porque nos obliga a preguntanos si verdaderamente nos molesta’l foriatu por ser foriatu, o si nos molesta sobre manera cuando llega ensin perres, ensin poder y necesitando ayuda.
La etiqueta «mena» -pa referise, nun escaezamos a rapacinos- lleva años cargándose nel debate públicu de significados sobre delincuencia, inseguridá y amenaza que nun s’apliquen automáticamente a otros colectivos estranxeros. Ye namás cuando la probitú, la racialización y la condición de foriatu se superponen cuando surde’l conflictu.
This work is licensed under a Creative Commons Attribution 4.0 International License.
