La UABRA va desendolcar hasta’l vienres 24 de xunetu tres cursos de 25 hores y un programa d’actividaes culturales alredor de la llingua asturiana

Llogu de la Universidá Asturiana de Branu

La Universidá Asturiana de Branu (UABRA), entamada pola Academia de la Llingua Asturiana (ALLA), abrió ayeri llunes 20 de xunetu una nueva edición del so programa formativu nel Campus d’El Milán de la Universidá d’Uviéu.

L’actu de bienllegada celebróse a les nueve de la mañana na Sala de Xuntes del Departamentu de Filoloxía Clásica y Románica de la Facultá de Filosofía y Lletres. Participaron el presidente de l’Academia, Xosé Antón González Riaño; la direutora de la UABRA, Claudia Elena Menéndez Fernández, y la vicerrectora d’Estensión Universitaria y Proyeición Cultural, Marta Mateo Martínez de Bartolomé.

La iniciativa desendólcase cola collaboración de la Universidá d’Uviéu y el sofitu de la Fundación Municipal de Cultura del Conceyu d’Uviéu. Hasta’l vienres 24, les instalaciones universitaries van acoyer tres propuestes formatives dirixíes a ampliar la conocencia y l’usu de la llingua asturiana en distintos ámbitos.

La programación inclúi’l cursu de Formación Llingüística Xeneral ‘Preparación pa la certificación C1 de llingua asturiana’, dirixíu por Claudia Elena Menéndez, académica, secretaria de l’ALLA y profesora de la Universidá d’Uviéu.

La ufierta complétase con dos cursos d’Afondamientu Cultural y Llingüísticu. El primeru, ‘El movimientu obreru na lliteratura asturiana contemporánea’, ta dirixíu por Darío de Dios. El segundu, ‘Intelixencia Artificial aplicada al aula de Llingua Asturiana’, tien como responsable a Roberto Avello. Los dos son profesores de la Universidá d’Uviéu. Cada cursu tien una duración de 25 hores y impártese n’horariu de mañana.

Amás de les clases, la UABRA preparó un programa d’actividaes complementaries que va permitir al alumnáu averase a distintos proyectos culturales, históricos y educativos rellacionaos cola llingua asturiana.

La primera xornada incluyó un diálogu ente Claudia Elena Menéndez ya Inaciu Galán alredor del proyeutu del Pequeñu Atles Llingüísticu d’Asturies (PALLA), una iniciativa dedicada al estudiu y representación de la diversidá llingüística del país.

Tamién se programó una sesión de cine sotituláu n’asturianu nel Cine Embajadores Foncalada. El xueves, l’alumnáu de la UABRA va participar nuna visita guiada a la sede de l’Academia de la Llingua Asturiana y nun percorríu pel centru d’Uviéu dedicáu a conocer la historia y la presencia pública de la llingua asturiana.

La programación va incluyir igualmente una mesa redonda nel Club de Prensa de La Nueva España sobre los ‘50 años de la manifestación de Conceyu Bable’, una movilización considerada fundamental na historia contemporánea del movimientu de reivindicación llingüística asturiana.

Con esta nueva edición, la Universidá Asturiana de Branu mantién la so función como espaciu de formación, alcuentru y actualización de conocimientos pa estudiantes, docentes y persones interesaes na llingua y la cultura asturianes.

This work is licensed under a Creative Commons Attribution 4.0 International License.