La Plataforma Solidaria Asturies con Palestina denuncia la propuesta de contratar a Magal Solutions pal caltenimientu de los sistemes de videovixilancia y seguridá perimetral del Puertu d’El Musel, pola vinculación de la empresa cola industria militar israelina. El colectivu reclama la intervención del Gobiernu asturianu y de les alministraciones estatales pa evitar l’adxudicación.

La mesa de contratación de l’Autoridá Portuaria de Xixón propunxo encargar a Magal Solutions SL el caltenimientu, durante dos años, de los sistemes de videovixilancia, comunicaciones, alarmes y seguridá perimetral d’El Musel. La compañía presentó una ufierta de 156.628,79 euros y consiguió la puntuación técnica y económica más alta de les dos empreses participantes. Sicasí, l’Autoridá Portuaria asegura que l’adxudicación entá nun ta resuelta y que ta revisando la documentación antes de tomar una decisión definitiva.

La Plataforma Solidaria Asturies con Palestina considera «ética y políticamente inaceptable» poner una infraestructura estratéxica asturiana en manes d’una empresa integrada nun conglomeráu directamente venceyáu cola industria armamentística israelina. Magal reconoz na so propia información corporativa que foi adquirida en 2021 por Aeronautics Ltd., filial de Rafael Advanced Defense Systems, y que dende entós actúa como integradora de soluciones de seguridá interior del grupu.

Rafael ye una corporación israelina de defensa de propiedá pública que fabrica sistemes militares y caltién contratos directos col Ministeriu de Defensa d’Israel. La empresa ye, ente otros productos, la contratista principal del sistema antimisiles Iron Dome y presenta les sos soluciones como tecnoloxíes probaes en combate.

La presencia de Magal n’El Musel nun sería nueva. La empresa instaló parte del zarramientu intelixente y del sistema de cámares del puertu, nuna segunda fase axudicada en 2022 por 2,7 millones d’euros. El conocimientu d’esos equipos propios foi precisamente ún de los elementos que favoreció la so puntuación na nueva licitación.

El Congresu aprobó’l 20 de mayu de 2025 iniciar la tramitación d’una proposición de llei pa establecer un embargu integral al comerciu d’armes y material de defensa con Israel. Meses dempués, el Real Decreto-llei 10/2025 consolidó la prohibición de comprar y vender material militar y tecnoloxíes de doble usu, amás de limitar el tránsitu de combustibles con posible usu militar. La norma, sicasí, nun prohibe de manera automática contratar servicios civiles de filiales de grupos armamentísticos israelinos, polo que la reclamación de la plataforma tien tamién una dimensión política y ética.

Asturies con Palestina reclama al Gobiernu del Principáu que use la so representación institucional y política pa evitar la contratación y pa garantizar que los puertos asturianos nun puedan emplegase nel tránsitu d’armes o suministros militares con destín a Israel. L’Autoridá Portuaria de Xixón ye un organismu públicu integráu na estructura estatal de Puertos del Estado y dependiente del Ministeriu de Tresportes.

La denuncia produzse nuna situación humanitaria estremadamente grave. Un informe d’UNICEF recoyía que, hasta’l 31 de marzu de 2026, más de 73.300 palestinos morrieren dende ochobre de 2023, ente ellos polo menos 21.500 neños y neñes. Les cifres difundíes pola Oficina de Medios del Gobiernu de Gaza eleven a 1.022 los menores d’un añu asesinaos.

Contratar a Magal significaría permitir que fondos públicos asturianos acabaren beneficiando indirectamente a un grupu empresarial que forma parte esencial de la industria militar israelina. Por eso esixese la paralización del procedimientu y una revisión de les relaciones comerciales de les instituciones asturianes con empreses venceyaes a la ocupación y a les operaciones militares contra’l pueblu palestín.

This work is licensed under a Creative Commons Attribution 4.0 International License.