L’alcuentru de cultura moza va cellebrar la so decimocuarta edición del 4 al 6 de setiembre de 2026 nel Recintu Ferial Luis Adaro. La organización espera superar los 25.000 visitantes con una programación dirixida a mocedá, families y persones aficionaes a la cultura dixital y popular.

 CometCon va tornar a Xixón per séptimu añu consecutivu pa cellebrar la so decimocuarta edición ente’l 4 y el 6 de setiembre nel Recintu Ferial Luis Adaro. L’alcuentru, convertíu nuna de les principales cites del ociu alternativu d’Asturies, prevé reunir a más de 25.000 visitantes procedentes de distintos puntos del norte peninsular.

La programación va volver combinar dalgunes de les actividaes que contribuyeron a la crecedera del eventu con nueves propuestes dirixíes a neños, mocedá y families. Ente los conteníos previstos atópense’l certame añal de cosplay, los torneos de videoxuegos, la participación de creadores dixitales, divulgadores y streamers, amás de les últimes tendencies venceyaes a la cultura en llinia.

CometCon 2026 va contar tamién con una zona comercial y un artist alley con más de 200 puestos. A ello van sumase talleres, charres, esposiciones, exhibiciones, concursos y competiciones, hasta completar más de 200 actividaes, toes elles incluyíes nel preciu d’accesu al recintu.

Una de les principales novedaes d’esta edición va ser el nuevu sistema de venta anticipada. Les entraes van poder mercase por adelantao a un preciu de 6,50 euros, frente a los 9,50 euros que van costar na taquilla. La organización busca facilitar asina l’accesu del públicu más mozo y premiar a quienes planifiquen con tiempu la so asistencia.

La entrada va ser de baldre pa los menores de cinco años, cola intención de favorecer la participación de les families. Dellos de los concursos y competiciones incluyíos nel programa van ofrecer, amás, premios en metálico.

L’alcuentru va mantener la so apuesta por una programación diversa, capaz de reunir conteníos venceyaos al entretenimientu dixital, la creatividá, la cultura popular y les actividaes participatives. A lo llargo de tres xornaes, el recintu ferial va acoyer propuestes pensaes pa públicos de distintes edaes ya intereses.

Los nomes de les persones invitaes y los detalles del programa van espublizase progresivamente a lo llargo del branu nos perfiles oficiales de CometCon n’Instagram y TikTok. Les entraes anticipaes yá tán a la venta, por tiempu llindáu, na páxina web del eventu.

CometCon 2026 cuenta cola collaboración de distintes alministraciones, entidaes públiques, organizaciones xuveniles ya instituciones económiques y culturales d’Asturies y Xixón.