Un cientu llargu d’activistes concentróse delantre de la Xunta Xeneral pa reclamar un cambiu urxente de modelu socioeconómicu

 El centru d’Uviéu acoyó esti miércoles una aición reivindicativa convocada por Asturies pol decrecer, un movimientu que xunta a distintes organizaciones sociales asturianes alredor d’una idea común: la necesidá d’abandonar un modelu económicu que mide’l progresu principalmente pola crecedera macroeconómica y sustituyilu por otru centrado nes necesidaes reales de la población, la xusticia social y leos llendes ecolóxicos del planeta. Asturies pol decrecer sostién que la crisis de la vivienda, la precariedá llaboral, el deterioru de los servicios públicos y la crisis ecolóxica nun son problemes aisllaos, sinón espresiones d’un mesmu sistema basáu nel xorrecimientu ensin llendes basáu en términos macroeconómicos.

Alredor d’un cientu d’activistes participó na concentración delantre de la Xunta Xeneral, coincidiendo cola celebración d’un plenu parlamentariu. L’actu tuvo precedíu por una representación artística que percorrió l’espaciu ente la sede parlamentaria, el Campu San Francisco y la plaza La Escandalera. Nella, les persones participantes escenificaron a la clase trabayadora, a quien busca vivienda, a los servicios públicos y al planeta como cuerpos encadenaos y maltrataos por un sistema capitalista personificáu nun millonariu que se beneficiaba d’esi maltratu.

La protesta remató col despliegue d’una llarga tela de colores cola que les participantes arrodiaron parcialmente la Xunta Xeneral. Nella podía lleese’l lema principal de la convocatoria: “DECRECIMIENTU YA!”. La imaxe buscaba treslladar, d’una manera simbólica, que les instituciones nun pueden siguir al marxe de les crisis sociales y ambientales que traviesen Asturies y el conxuntu del planeta.

La xornada desendolcóse en plena alerta por calor y baxo temperatures elevaes. Les participantes acudieron preparaes con agua y gorres pa les persones que sosteníen les teles y los mensaxes. Esa circunstancia marcó tamién el tonu políticu de la intervención pública del movimientu. “El calor de güei nun ye escenografía de la nuesa aición, sinón el productu d’una inacción, la de los nuestros gobiernos”, señaló una de les portavoces, que venceyó directamente la crisis climática cola responsabilidá d’un sistema socioeconómicu basáu na acumulación de riqueza en manes d’una minoría.

El decrecimientu, nel sen que defenden los movimientos sociales y bona parte de la lliteratura académica que lu estudia, nun significa una recesión nin un emprobrecimientu xeneralizáu. La recesión ye una cayida desordenada de l’actividá económica dientro d’un sistema que depende del crecimientu, y suel traer paru, precariedá y recortes. El decrecimientu propón otra cosa: una reducción planificada, democrática y xusta del usu d’enerxía y materiales, especialmente nos sectores más contaminantes y nos consumos superfluos, al empar que se refuercen los bienes comunes, los servicios públicos, los cuidaos, la vivienda, la salú, la educación, el tresporte colectivu y les condiciones de vida de la mayoría social.

Dende esti puntu de vista, el problema nun ye “producir menos” ensin más, sinón decidir qué tien que menguar y qué tien que medrar. Tendríen que menguar, por exemplu, les actividaes que disparen les emisiones, destrúin territoriu o consumen recursos ensin responder a necesidaes sociales reales. Y tendríen que medrar, o polo menos fortalecese, aquelles que garanticen una vida digna: la rede pública de servicios, la soberanía alimentaria, la rehabilitación enerxética, los trabayos de cuidaos, la cultura, la participación democrática y les formes d’economía venceyaes al territoriu.

Asturies pol decrecer parte d’esa llectura pa afirmar que les crisis actuales nun pueden tratase como compartimentos estancos. La dificultá d’acceder a una vivienda, la temporalidá y los salarios baxos, la saturación de la sanidá y la educación públiques, la perda de biodiversidá, la contaminación o l’aumentu de fenómenos climáticos estremos tienen, según el movimientu, una mesma raíz: un modelu que pon la rentabilidá privada y la crecedera económica per delantre del bienestar colectivu y de los llendes físicos del planeta.

La escoyeta de la Xunta Xeneral como escenariu nun foi casual. Nel manifiestu fechu públicu pola plataforma, robláu por una treintena d’organizaciones sociales asturianes, el movimientu señala “la responsabilidá d’esta clase política, güei acomodada nun sistema que da la espalda a la participación real de la ciudadanía, al so bienestar y al so futuru”. El testu fai un llamamientu a superar les “batalles sectoriales desconectaes ente sí” y a confrontar el sistema nel so conxuntu.

La concentración d’esti miércoles foi la presentación pública d’Asturies pol decrecer, pero la plataforma anuncia que la so actividá va tener continuidá. Ente’l 5 y l’11 d’ochobre tienen previsto entamar unes Jornades pol Decrecimientu n’Asturies, nes que quieren abrir un espaciu de formación, alderique y organización social. L’oxetivu, según indiquen, ye que la sociedá asturiana empiece a “construyir comunidá y estratexa dende la base” pa facer frente a les crisis actuales y avanzar hacia un cambiu de sistema.

Con esta primera aición pública, Asturies pol decrecer quier asitiar nel centru l’alderique una entruga que, al so xuiciu, la política institucional evita: cuánto más puede aguantar una sociedá que subordina la vida, el territoriu y los derechos sociales a la lóxica del crecimientu económicu permanente.

This work is licensed under a Creative Commons Attribution 4.0 International License.