Asturies figura ente los territorios con peores datos del Estáu nel sistema d’atención a la dependencia, según el informe del Observatoriu Estatal de la Dependencia ellaboráu pola Asociación Estatal de Directores y Xerentes de Servicios Sociales con datos oficiales actualizaos hasta mayu de 2026.

El documentu alerta d’un empeoramientu bultable de los tiempos de tramitación y sitúa Asturies ente les zones más retrasaes del Estáu.

El principal problema ye’l tiempu d’espera. Asturies rexistra una media de 411 díes pa resolver un espediente de dependencia, más del doble del plazu máximu de 180 díes establecíu pola normativa estatal. Namái Murcia, con 552 díes, y Andalucía, con 446, presentan rexistros peores. La media estatal asítiase nos 320 díes.

Amás, l’informe destaca qu’Asturies ye onde más apioró esti indicador no que va d’añu. Dende avientu de 2025 hasta mayu de 2026, el tiempu mediu de tramitación medró en 84 díes, mientres la media estatal amenorgóse en doce. El Observatoriu señala de manera específica’l casu asturianu como un de los más esmolecedores del conxuntu estatal.

Estos datos lleguen dempués d’un exerciciu especialmente negativu. El XXVI Dictame del Observatoriu señaló qu’en 2025 finaron n’Asturies 1.245 persones mientres permanecíen nes llistes d’espera de la dependencia. D’elles, 1.179 entá nun teníen reconocíu’l grau de dependencia y 66 contaben yá col derechu reconocíu pero siguíen esperando la prestación o’l serviciu correspondiente.

L’Observatoriu atribúi esta situación a la insuficiencia de recursos, a la ralentización del sistema nos caberos años y, especialmente, a la complexidá burocrática que sigue caracterizando la xestión de la dependencia. El documentu denuncia que los procedimientos alministrativos siguen siendo excesivamente llargos y que les distintes fases de valoración, reconocencia y asignación de recursos acaben convirtiéndose nun obstáculu pa les persones dependientes y les sos families.

Nel conxuntu del Estáu, más de 265.000 persones permanecíen a finales de mayu a la espera de dalgún trámite rellacionáu cola dependencia, ente elles más de 155.000 que yá tienen reconocíu’l so derechu pero siguen ensin recibir atención. Nos cinco primeros meses de 2026 finaron 13.503 persones mientres esperaben una resolución o una prestación.

Ante esta situación, el Gobiernu asturianu anunció un plan de choque dotáu con 2,2 millones d’euros pa rebaxar los tiempos de tramitación y intentar asitialos nel plazu llegal de seis meses anantes de rematar l’añu, oxetivu que, acordies a los datos del Observatoriu, ta lloñe de dir a conseguise, puesto que s’avanza en sen contrariu y síguese ensin revertir una situación que vien arrastrándose dende hai años y que sigue afectando a miles de persones mayores y dependientes, obligándoles a esperar más d’un añu pa recibir una ayuda que, en munchos casos, resulta esencial pa la so calidá de vida.

This work is licensed under a Creative Commons Attribution 4.0 International License.