El Parque Fluvial de Viesques acueye del 5 al 7 de xunu la tercer edición de Xixón Folk, un festival que sigue afitándose como una de les principales cites dedicaes a la música y la cultura tradicional asturiana. Entamáu pola Banda Gaites Saxum, l’alcuentru apuesta por una propuesta que va acullá de los conciertos y busca convertir la tradición nun espaciu de participación, convivencia y tresmisión cultural.

Mientres tres xornaes, la esplanada del parque va tresformase nun puntu d’alcuentru onde la música folk va compartir protagonismu con mercaos tradicionales, talleres artesanos, demostraciones d’oficios, animación mitolóxica, xuegos tradicionales, gastronomía y actividaes pensaes pa toles edaes. La organización destaca precisamente esi calter interxeneracional y participativu como una de les señes d’identidá del festival.

La programación musical cuenta con nomes bien conocíos del panorama asturianu. Nel cartelu figuren Dixebra, Nerea Vázquez, la Banda de Gaites de Castrillón, la Banda de Gaites El Gaitero de Villaviciosa y la propia Banda de Gaites Saxum, amás d’otres formaciones y agrupaciones musicales. La Nueche Folk del sábadu apaez como ún de los momentos más esperaos de la edición, cola actuación principal de Dixebra.

El festival va acoyer tamién el III Alcuentru de Bandes de Gaites Saxum, que xuntará a distintes formaciones procedentes de diversos puntos d’Asturies. L’actividá va incluyir un desfile y la participación especial d’Eva Hevia, nuna xornada que pretende reivindicar el papel de les bandes de gaites na conservación y difusión del patrimoniu musical asturianu.

Otra de les grandes apuestes de Xixón Folk son los talleres participativos. Los asistentes van poder averase a oficios y saberes tradicionales venceyaos a la cerámica, el cueru, la cestería, la xoyería, la llana, la ellaboración de sidra duce, la construcción d’instrumentos tradicionales o les marionetes, ente otres disciplines. La intención ye que la cultura tradicional nun se llimite a la observación, sinón que pueda vivise y esperimentase de forma direuta.

Dende la organización señalen que’l festival nació cola voluntá de xorrecer progresivamente y consolidase como una referencia cultural n’Asturies. Con esta tercer edición, Xixón Folk amuesa una clara evolución tantu en participación como en programación, afitándose como un espaciu onde la música, la artesanía, la gastronomía y les tradiciones asturianes comparten protagonismu.

Con entrada llibre y gratuita, la cita vuelve convertir Viesques nun gran escaparate de la cultura popular asturiana, reivindicando la tradición como una realidá viva y con capacidá pa siguir atrayendo a les nueves xeneraciones.

This work is licensed under a Creative Commons Attribution 4.0 International License.