La presentación de la plataforma Asturies pola Xunidá permite una llectura política que va acullá de la posible reordenación electoral de la izquierda n’Asturies de cara a 2027. La principal novedá nun ta tanto na llamada a la xunidá como nel marcu políticu que los sos impulsores escueyen pa formular esa propuesta.
Nun ye un secretu que la iniciativa naz fundamentalmente dende sectores venceyaos a la izquierda española con presencia n’Asturies. Precisamente por ello, resulta especialmente significativa la reivindicación d’un «marcu políticu-institucional asturianu» como ferramienta necesaria pa encarar los retos económicos, sociales, culturales y democráticos del país.
Mientres décades, una parte importante d’esa izquierda desendolcó la so aición política dientro de marcos conceptuales y organizativos definíos fuera d’Asturies, lo que llendó con frecuencia la capacidá d’articular una respuesta propia a los problemas específicos d’Asturies. Esa dinámica, fondamente enraigonada nel sucursalismu y la dependencia de la cultura política de la izquierda estatal, constituyó una de les sos principales debilidaes nel nuesu país.
Por ello, acullá de les diferencies que puedan esistir sobre les propuestes concretes recoyíes nel so manifiestu, nun dexa de ser relevante que dende estos ámbitos se reconoza agora de manera espresa la necesidá de contar con ferramientes polítiques asturianes y d’avanzar na normalización de la llingua propia al traviés de la oficialidá.
Ye pronto pa saber si esti plantegamientu tendrá una traducción práctica y sostenida nel tiempu o si va quedar nel terrén de les declaraciones. Pero lo cierto ye que la simple asunción d’un marcu políticu-institucional asturianu supón un avance respeuto a posiciones sucursalistes que, fasta agora, miraben con recelu cualisquier formulación que situara Asturies como suxetu políticu.
Nesti sen, la iniciativa pue interpretase tamién como un síntoma d’evolución política y como un primer pasu na superación d’una de les carauterístiques que más condicionaron históricamente a la izquierda española n’Asturies: la so tendencia a actuar como sucursal de proyeutos y prioridaes definíos fuera del país.
Queda per percorrer camín. Pero reconocer qu’Asturies precisa d’un marcu políticu propiu pa defender los sos intereses coleutivos ye, ensin dulda, un puntu partida más prometedor que siguir negando una realidá que cada vegada resulta más evidente.
This work is licensed under a Creative Commons Attribution 4.0 International License.
