El Sindicatu de Vivienda d’Asturies y el Sindicatu d’Inquilinos y Inquilines d’Asturies convoquen esti vienres 6 de xunu un manifestamientu pol drechu a la vivienda que partirá a les 12.00 hores de la plaza de l’Humedal de Xixón. La movilización busca denunciar la situación d’emerxencia habitacional que vive bona parte de la población y reclamar midíes que garanticen l’accesu a una vivienda digna y asequible.

El problema de la vivienda n’Asturies ta venceyáu a múltiples factores. Ente ellos destaquen el turismu masivu, que cada vegada ocupa más espacios destinaos a residencia, y la llegada de persones con trabayos a distancia y capacidá adquisitiva superior a l’asturiana que s’instalen temporalmente n’Asturies, circunstancies que contribúin al encarecimientu de los alquileres y del mercáu inmobiliariu.

La precariedá llaboral, los salarios baxos y la inestabilidá nel emplegu son otros elementos que dificulten l’accesu a una vivienda. Una situación que, según denuncien los organizadores, torga a munches persones desendolcar proyectos de vida a llargu plazu y afrontar los costes actuales del mercáu.

La falta de servicios y comunicaciones na fastera rural ye otra de les cuestiones qu’agrava la situación. Esta realidá dificulta la vida nos pueblos y llenda les posibilidaes d’aprovechar el parque de vivienda esistente fuera de los principales núcleos urbanos. A ello súmase la especulación inmobiliaria, a la que responsabilicen de convertir la vivienda nun negociu en llugar d’un derechu fundamental.

Les consecuencies d’esta situación dexense sentir especialmente ente la mocedá, con dificultaes crecientes pa emancipase, pero tamién nel aumentu de les viviendes compartíes, en dellos casos con condiciones d’hacinamientu, na imposibilidá de formar families y nel aumentu del númberu de persones que viven na cai.

Los colectivos convocantes recuerden que la vivienda convirtióse nunu de los principales problemes sociales y económicos de la clas trabayadora. «Mientres unos pocos faen negociu con un derechu básicu, miles de families ven cómo los alquileres y l’accesu a una vivienda digna se vuelven cada vez más imposibles», señalen.

Les organizaciones promotores insisten na necesidá d’impulsar polítiques que frenen la especulación y garanticen viviendes accesibles pa la mayoría social «Porque la vivienda ye un drechu, non un negociu».

This work is licensed under a Creative Commons Attribution 4.0 International License.