El Colexu Públicu Peña Tú de Llanes presentó’l single «Pericote Peña Tú», una pieza musical que recueye’l trabayu realizáu a lo llargo del cursu 2025-2026 dientro del Proyectu de Música Tradicional impulsáu dende l’área d’Educación Artística, concretamente na asignatura de Música

El proyectu foi dirixíu y producíu por Vítor Carbajal, col sofitu y desarrollu pedagóxicu de Carlos José de la Fuente y del propiu Carbajal, maestros d’Educación Musical del centru, a los que se sumó tamién Ángela Meana. La iniciativa implicó a tolos escolinos d’Educación Primaria, que tuvieron la oportunidá d’averase a la música tradicional del Oriente d’Asturies y del conceyu Llanes al traviés d’una de les sos manifestaciones más emblemátiques: el Pericote.

Mientres el segundu trimestre del cursu, l’alumnáu trabayó na presentación, análisis y aprendizaxe d’esta pieza tradicional. Más tarde, nes primeres selmanes del mes de mayu, tolos escolinos y escolines de Primaria participaron nun procesu de grabación por pistes nel estudiu de la Escuela de Música Tradicional y la Banda Gaites Llacín, entidá de la que tamién ye director Vítor Carbajal.

El resultáu final busca xunir dos formes d’interpretación del Pericote: per una parte, la so versión más instrumental, basada na gaita y el tambor; y per otra, la versión cantada acompañada de percusión tradicional, con pandereta, pandero y tambor. Too ello desenvolvíu baxo una concepción d’instrumentación escolar que da llugar a una versión emocionante na que destaquen tantu la riqueza instrumental como les voces blanques de tol alumnáu d’Educación Primaria del centru.

La iniciativa enmárcase dientro del Aprendizaxe Basáu en Proyectos (ABP), una de les metodoloxíes impulsaes pola LOMLOE. Dende esta perspeutiva, l’alumnáu pudo afondar nel estudiu de la música tradicional partiendo de los saberes básicos del currículu d’Educación Artística. Amás del trabayu sobre los elementos del llinguaxe musical necesarios pa comprender y interpretar la obra, los neños y neñes participaron activamente nes distintes fases del procesu de producción musical, dende la grabación multipista hasta la edición, mezcla, masterización y publicación final del trabayu.

Esti procesu permitió conocer de manera práctica los distintos perfiles profesionales venceyaos a la industria musical, facilitando una comprensión real y contextualizada de los conteníos curriculares, adaptaos en cada casu a les necesidaes y característiques de los distintos niveles d’Educación Primaria.

Nel separtáu técnicu, el proyectu cuntó cola collaboración de Sergio Rodríguez y Olaya Llucía Díaz, d’Estudios Tutu, encargaos de la grabación, mezcla y masterización. Xunto a ellos participaron Dani Álvarez y Kai Martínez, responsable de la toma d’imáxenes mientres les sesiones de grabación. Gracies a esti trabayu conxuntu, el «Pericote Peña Tú» cuenta tanto con una pista d’audiu como con una producción audiovisual disponible en plataformes dixitales como Spotify y YouTube.

Dende’l centru destacan especialmente’l sofitu de tola Comunidá Educativa, incluyendo families, alumnáu, equipu directivu, profesoráu y AMPA, asina como la collaboración del Conceyu de Llanes al traviés de la Conceyalía de Cultura y la Casa de Cultura, que participaron activamente nesta apuesta pola música d’arraigañu del conceyu.

Tamién foi fundamental la collaboración de les Escueles de Música Clásica y Tradicional, amás de la Bandina y la Banda Gaites Llacín, que prestaron sofitu técnicu ya instrumental. Del mesmu mou, destaca la participación de los trés Bandos de Llanes nel procesu d’adaptación musical, consiguiendo una versión que xune distintes tradiciones interpretatives y que s’afai perfectamente a les voces infantiles de la villa.

El resultáu d’esta iniciativa yá puede reproducise nes principales plataformes dixitales. Amás, próximamente van instalase cartelos con códigos QR en distintos puntos estratéxicos de Llanes, permitiendo l’accesu directu a la grabación y contribuyendo a dar visibilidá a ún de los símbolos más representativos de la identidá llanisca, que sigue viviendo y tresmitiéndose ente les xeneraciones más nueves.

This work is licensed under a Creative Commons Attribution 4.0 International License.